राष्ट्रीय श्रमिक आघाडीचा भव्य मेळावा; कर्मचाऱ्यांच्या प्रश्नांसाठी यशवंतभाऊ भोसले यांची ठाम भूमिका

पुणे प्रतिनिधी : रोहन सोनाळे 

पिंपरी-चिंचवड, दि. 22 जून 2026 : पिंपरी-चिंचवड महानगरपालिकेतील संघटनेच्या सभासद कर्मचाऱ्यांच्या विविध प्रलंबित प्रश्नांना वाचा फोडण्यासाठी आणि त्यांच्या अडचणी जाणून घेण्यासाठी राष्ट्रीय श्रमिक आघाडीच्या वतीने संत तुकाराम नगर, पिंपरी येथे भव्य मेळाव्याचे आयोजन करण्यात आले.

या मेळाव्याच्या अध्यक्षस्थानी राष्ट्रीय श्रमिक आघाडीचे अध्यक्ष तथा ज्येष्ठ कामगार नेते यशवंतभाऊ भोसले उपस्थित होते. यावेळी त्यांनी उपस्थित कर्मचाऱ्यांना मार्गदर्शन करताना संघटनेच्या कार्याचा आढावा घेत कर्मचाऱ्यांच्या हक्कांसाठी सुरू असलेल्या प्रयत्नांची माहिती दिली.

यशवंतभाऊ भोसले म्हणाले, "गेल्या 18 वर्षांपासून राष्ट्रीय श्रमिक आघाडी महानगरपालिका कर्मचाऱ्यांच्या पाठीशी खंबीरपणे उभी आहे. कर्मचाऱ्यांचे कल्याण, सेवा हक्क, न्याय्य मागण्या आणि विविध प्रशासकीय प्रश्न सोडविण्यासाठी संघटना सातत्याने प्रयत्नशील आहे. कर्मचाऱ्यांच्या प्रत्येक समस्येवर सकारात्मक मार्ग काढण्यासाठी आम्ही पूर्ण ताकदीने काम करत आहोत."

मेळाव्यादरम्यान अनेक कर्मचाऱ्यांनी आपल्या समस्या, अडचणी आणि प्रलंबित प्रश्न मांडले. या सर्व मुद्द्यांवर यशवंतभाऊ भोसले यांनी सविस्तर चर्चा करत संबंधित प्रश्न सोडविण्यासाठी आवश्यक ती कार्यवाही करण्याचे आश्वासन दिले.

कर्मचाऱ्यांच्या योगदानाचे कौतुक करताना त्यांनी सांगितले की, महानगरपालिकेच्या विकासात कर्मचाऱ्यांची भूमिका अत्यंत महत्त्वाची आहे. त्यामुळे त्यांच्या न्याय्य मागण्यांसाठी संघटना भविष्यातही सातत्याने लढा देत राहील आणि त्यांना न्याय मिळवून देण्यासाठी प्रयत्न करेल.

या मेळाव्याला महानगरपालिकेतील मोठ्या संख्येने सभासद कर्मचारी उपस्थित होते. शिस्तबद्ध आणि उत्साहपूर्ण वातावरणात पार पडलेल्या या मेळाव्यात कर्मचाऱ्यांच्या एकजुटीचे आणि संघटनेवरील विश्वासाचे दर्शन घडले.