राज्य कामगार विमा योजनेच्या सेवा अधिक सक्षम करा – राज्यमंत्री मेघना साकोरे-बोडीकर

मुंबई, दि. ११ : राज्यातील कामगारांना अधिक दर्जेदार आणि सुलभ आरोग्य सुविधा उपलब्ध करून देण्यासाठी राज्य कामगार विमा योजनेची प्रभावी अंमलबजावणी होणे आवश्यक असल्याचे सार्वजनिक आरोग्य व कुटुंब कल्याण राज्यमंत्री मेघना साकोरे-बोडीकर यांनी सांगितले.

निर्मल भवन येथील एमएसआरडीसी कार्यालयात आयोजित बैठकीत त्यांनी राज्य कामगार विमा योजनेचा सविस्तर आढावा घेतला.

बैठकीत योजनेअंतर्गत नोंदणीकृत सदस्यांची संख्या, सदस्यांकडून प्राप्त होणारी वर्गणी, विमा योजनेंतर्गत कार्यरत नसलेले दवाखाने, नवीन दवाखाने सुरू करण्याबाबतची स्थिती तसेच राज्यातील कामगारांना उपलब्ध करून देण्यात येणाऱ्या खाटांची माहिती यावर सखोल चर्चा करण्यात आली.

राज्यमंत्री साकोरे-बोडीकर यांनी कामगारांना वेळेत आणि गुणवत्तापूर्ण आरोग्य सुविधा मिळणे अत्यंत महत्त्वाचे असल्याचे सांगत विमा योजनेंतर्गत बंद असलेल्या रुग्णालये व दवाखान्यांची कार्यक्षमता वाढविण्याचे निर्देश दिले. औद्योगिक क्षेत्रांमध्ये वाढत्या गरजा लक्षात घेऊन नवीन दवाखाने सुरू करण्याच्या प्रस्तावांवरही यावेळी चर्चा करण्यात आली.

कामगार विमा योजनेंतर्गत उपलब्ध नसलेल्या रुग्णखाटा, उपचार सुविधा, वैद्यकीय मनुष्यबळ आणि औषध उपलब्धता याबाबतही बैठकीत आढावा घेण्यात आला. कामगार आणि त्यांच्या कुटुंबीयांना उपचारासाठी कोणत्याही प्रकारची अडचण येऊ नये, यासाठी आवश्यक उपाययोजना करण्याचे निर्देश त्यांनी संबंधित अधिकाऱ्यांना दिले.

या बैठकीस संबंधित विभागाचे वरिष्ठ अधिकारी उपस्थित होते.