कात्रज-गुजरवाडी फाटा रस्ता रुंदीकरणाला गती; डीपी मार्किंग, भूसंपादन आणि अतिक्रमण हटविण्याचे आदेश

प्रतिनिधी : रोहन सोनाळे 

पुणे, दि. 28 ऑगस्ट 2026 : पुणे शहरातील वाढती वाहतूक कोंडी आणि नागरिकांच्या दैनंदिन प्रवासातील अडचणी दूर करण्याच्या दृष्टीने कात्रज चौक ते गुजरवाडी फाटा रस्ता रुंदीकरणाच्या कामाला गती देण्याचे निर्देश पुणे महानगरपालिकेचे अतिरिक्त महापालिका आयुक्त (विशेष) ओमप्रकाश दिवटे यांनी दिले.

महापालिका आयुक्त नवल किशोर राम यांच्या मार्गदर्शनाखाली प्रभाग क्रमांक 38 मधील कात्रज चौक ते मांगडेवाडी-सातारा रस्ता परिसराची आज मा. सभासद व संबंधित विभागांच्या अधिकाऱ्यांसमवेत संयुक्त पाहणी करण्यात आली. या पाहणीदरम्यान रस्त्याची सद्यस्थिती, प्रस्तावित रुंदीकरण आणि आवश्यक पायाभूत सुविधांबाबत सविस्तर आढावा घेण्यात आला.

कात्रज ते गुजरवाडी फाटा रस्ता रुंद करण्याचे निर्देश

सातारा रस्ता हा मोठ्या प्रमाणात वाहतूक असलेला मार्ग असल्याने कात्रज ते गुजरवाडी फाटा रस्ता रुंद करून विकसित करण्याची आवश्यकता असल्याचे यावेळी स्पष्ट करण्यात आले.

नवीन समाविष्ट गावांच्या परिसरातील कात्रज ते गुजरवाडी फाटा मार्गाचे नियोजनबद्ध रुंदीकरण करून रस्ता विकसित करण्याच्या दृष्टीने संबंधित विभागांनी तातडीने कार्यवाही करण्याचे निर्देश देण्यात आले.

डीपी नकाशानुसार रस्त्याचे मार्किंग

कात्रज ते गुजरवाडी फाटा रस्त्याचे डीपी नकाशानुसार सर्वेक्षण करून रस्त्याची डीपी मार्किंग करण्याच्या सूचना बांधकाम विभागाला देण्यात आल्या.

रस्त्याच्या रुंदीकरणासाठी आवश्यक असलेल्या जागेचे सर्वेक्षण करून पुढील कार्यवाही करण्यावर भर देण्यात आला आहे. भूसंपादन विभागाने रस्त्याच्या हद्दीत येणारी आवश्यक जागा ताब्यात घेण्यासाठी कार्यवाही करावी, तर पथ विभागाने रस्ता रुंदीकरणासाठी सविस्तर अंदाजपत्रक (Detailed Estimate) तयार करावे, असे निर्देश देण्यात आले.

रस्त्याच्या रुंदीत येणाऱ्या झाडांचे सर्वेक्षण

प्रस्तावित रस्ता रुंदीमध्ये येणाऱ्या झाडांचे सर्वेक्षण करण्याच्या सूचना पथ विभागाला देण्यात आल्या आहेत. आवश्यक झाडे काढण्याबाबतचा प्रस्ताव क्षेत्रीय कार्यालयाकडे सादर करावा, असेही निर्देश देण्यात आले.

तसेच वन विभागाच्या मालकीच्या किंवा संबंधित जागेबाबत आवश्यक त्या परवानग्या व कार्यवाहीसाठी वन विभागाशी पत्रव्यवहार करण्याच्या सूचना देण्यात आल्या.

MSEDCL केबल भूमिगत करण्याचे निर्देश

रस्ता रुंदीकरणाच्या कामात येणाऱ्या एम.एस.ई.डी.सी.एल.च्या विद्युत केबल्स भूमिगत करणे तसेच आवश्यक ठिकाणी विद्युत पोल स्थलांतरित करणे यासाठी पथ विभागाने विद्युत विभागाकडे प्रस्ताव सादर करावा, असे निर्देश देण्यात आले.

यामुळे भविष्यातील रस्ता विकासाच्या कामात अडथळे निर्माण होऊ नयेत आणि रस्त्याची वाहतूक क्षमता वाढविता यावी, यासाठी विविध विभागांमध्ये समन्वय साधण्यावर भर देण्यात आला.

पावसाळी लाईन आणि अतिक्रमण हटविण्यावर भर

रस्त्याच्या प्रस्तावित रुंदीमध्ये आवश्यक ठिकाणी पावसाळी लाईन विकसित करण्याचे निर्देश पथ विभागाला देण्यात आले. तसेच रस्त्याच्या रुंदीमध्ये येणारे अतिक्रमण क्षेत्रीय कार्यालयाने काढावे, असे आदेश देण्यात आले.

कात्रज ते गुजरवाडी फाटा रस्ता रुंदीकरणासाठी परिपूर्ण अंदाजपत्रक तयार करून निविदा प्रक्रिया राबविण्याचे आदेश अतिरिक्त महापालिका आयुक्त (विशेष) ओमप्रकाश दिवटे यांनी संबंधित अधिकाऱ्यांना दिले.

विविध विभागांच्या समन्वयातून कामाला गती

रस्ता रुंदीकरणासाठी भूसंपादन, बांधकाम, पथ, विद्युत आणि क्षेत्रीय कार्यालय या विविध विभागांमध्ये समन्वय साधून कामे वेळेत पूर्ण करण्याच्या सूचना देण्यात आल्या. वाहतूक कोंडी कमी करण्यासोबतच भविष्यातील वाढती वाहतूक लक्षात घेऊन रस्त्याची पायाभूत सुविधा सक्षम करण्याचा महापालिकेचा प्रयत्न आहे.

पाहणीवेळी अधिकारी व सभासद उपस्थित

या संयुक्त पाहणीस पुणे मनपाचे सभासद व्यंकोजी खोपडे, प्रतिभाताई चोरघे, संदीप बेलदरे आणि युवराज बेलदरे उपस्थित होते.

तसेच पथ विभागाचे अधीक्षक अभियंता अजय वायसे, कार्यकारी अभियंता सुरेश साखळे, बांधकाम विभागाचे कार्यकारी अभियंता संतोष लांजेकर, धनकवडी-कात्रज-आंबेगाव क्षेत्रीय कार्यालयाच्या सहायक महापालिका आयुक्त सुरेखा भणगे, पथ विभागाचे उपअभियंता व्यंकटेश इंद्राक्षे, भूसंपादन विभागाचे उपअभियंता दिगंबर बांगर तसेच संबंधित विभागांचे अधिकारी व कर्मचारी उपस्थित होते.

कात्रज ते गुजरवाडी फाटा रस्ता रुंदीकरणामुळे या मार्गावरील वाहतूक व्यवस्था अधिक सक्षम होऊन नागरिकांना दिलासा मिळण्याची अपेक्षा आहे.