गणेशोत्सव मंडळांच्या समन्वयातून उत्सव अधिक सुरक्षित, शिस्तबद्ध आणि आनंददायी करूया

प्रतिनिधी: उमेश जाधव 

कोल्हापूर : गणेशोत्सव हा महाराष्ट्राच्या सांस्कृतिक आणि सामाजिक जीवनाचा अविभाज्य भाग असून, गणेशोत्सव मंडळांमधील समन्वय आणि नागरिकांच्या सक्रिय सहभागातून यंदाचा उत्सव अधिक सुरक्षित, शिस्तबद्ध, स्वच्छ आणि आनंददायी करण्याचे आवाहन करण्यात आले आहे. उत्सव साजरा करताना पर्यावरण संवर्धन, स्वच्छता, नागरिकांची सुरक्षितता आणि सामाजिक बांधिलकी यांना प्राधान्य देण्याची गरज व्यक्त करण्यात आली आहे.

गणेशोत्सव काळात गणेश मंडपाचा परिसर, मिरवणुकीचे मार्ग तसेच विसर्जनस्थळे स्वच्छ ठेवणे ही केवळ गणेश मंडळांची नव्हे, तर उत्सवात सहभागी होणाऱ्या प्रत्येक नागरिकाची जबाबदारी आहे. उत्सवादरम्यान निर्माण होणारे निर्माल्य, प्लॅस्टिकच्या पिशव्या, बाटल्या तसेच अन्य कचऱ्याची योग्य पद्धतीने विल्हेवाट लावणे आवश्यक आहे. बाप्पांच्या आगमनापासून ते विसर्जनापर्यंत परिसर स्वच्छ ठेवण्याचा संकल्प प्रत्येकाने करावा, असे आवाहन करण्यात आले आहे.

पर्यावरणपूरक गणेशोत्सवाला प्राधान्य

महाराष्ट्रातील गणेशोत्सवाला मोठी सांस्कृतिक आणि ऐतिहासिक परंपरा लाभली आहे. लोकसहभागातून साजरा होणाऱ्या या उत्सवाला सामाजिक परिवर्तनाची विचारधारा लाभली आहे. त्यामुळे या परंपरेसोबतच पर्यावरण संवर्धन, नागरिकांची सुरक्षितता आणि सामाजिक बांधिलकी यांची सांगड घालण्याची आवश्यकता आहे.

शासनाच्या वतीने लोककलांवर आधारित सांस्कृतिक कार्यक्रम, मातीच्या गणेशमूर्ती तयार करण्याच्या कार्यशाळा, उत्कृष्ट गणेश मंडळ स्पर्धा, सजावट स्पर्धा तसेच विविध उपक्रमांच्या माध्यमातून पर्यावरणपूरक गणेशोत्सवाला प्रोत्साहन दिले जात आहे.

यासोबतच प्रदूषणमुक्त परिसर, स्वच्छता, सामाजिक कार्य आणि विधायक उपक्रमांना महत्त्व देण्यात येत आहे. गणेशोत्सवाच्या माध्यमातून समाजामध्ये पर्यावरणाविषयी जागृती निर्माण करण्याबरोबरच नागरिकांमध्ये सामाजिक जबाबदारीची भावना अधिक दृढ करण्यावर भर दिला जात आहे.

पारंपरिक कला आणि स्थानिक कारागिरांना प्रोत्साहन

पर्यावरण संवर्धनासोबतच महाराष्ट्रातील पारंपरिक कलांचे जतन करणे आणि स्थानिक कलाकारांना प्रोत्साहन देणे आवश्यक आहे. गणेशोत्सवाच्या विविध उपक्रमांमधून स्थानिक कला आणि ग्रामीण भागातील कारागिरांना व्यासपीठ उपलब्ध करून देण्याचा प्रयत्न केला जात आहे. त्यामुळे पारंपरिक कलांचे संवर्धन होण्याबरोबरच ग्रामीण भागातील कारागिरांना रोजगाराच्या संधीही उपलब्ध होऊ शकतात.

सामाजिक एकोपा आणि जबाबदारीचा संदेश

गणेशोत्सव हा केवळ धार्मिक किंवा सांस्कृतिक उत्सव नसून तो लोकसंस्कृती, सामाजिक एकोपा, पर्यावरण संवर्धन आणि सामाजिक जबाबदारीची शिकवण देणारे प्रभावी व्यासपीठ आहे. उत्सवाचा आनंद घेत असताना पर्यावरणाचे नुकसान होणार नाही आणि नागरिकांची सुरक्षितता अबाधित राहील, याची प्रत्येकाने काळजी घेणे आवश्यक आहे.

पर्यावरणपूरक उत्सवासाठी प्रत्येक नागरिकाने आपल्या परीने छोटंसं का होईना, पण जबाबदारीने आणि मनापासून सकारात्मक पाऊल उचलावे. गणेश मंडळांनीही परस्पर समन्वय ठेवून स्वच्छता, शिस्त, सुरक्षितता आणि सामाजिक उपक्रमांना प्राधान्य द्यावे, असे आवाहन करण्यात आले आहे.

श्री गौरी-गणेशाच्या भक्तीचा उत्साह कायम ठेवत, सामाजिक भान जपत आणि भावी पिढीचे भविष्य सुरक्षित ठेवण्यासाठी यंदाचा गणेशोत्सव पर्यावरणपूरक पद्धतीने साजरा करूया आणि उत्सवाचा आनंद द्विगुणित करूया, असे आवाहन वृषाली पाटील, सहायक संचालक (माहिती), विभागीय माहिती कार्यालय, कोल्हापूर यांनी केले आहे.