भांडुप स्थानकाबाहेर पुन्हा अपघाताचा धोका; सुरक्षा उपायांबाबत प्रशासनावर प्रश्नचिन्ह, स्टील स्टॉपरची मागणी

मुंबई ब्यूरो अनिल सावरे 

मुंबई : मुंबईतील भांडुप रेल्वे स्टेशन  पश्चिम परिसरात पुन्हा एकदा अपघाताचा धोका समोर आल्याने नागरिकांच्या सुरक्षेचा प्रश्न ऐरणीवर आला आहे. बुधवारी दुपारच्या सुमारास चालक नसताना एक ट्रक अचानक सरकत थेट फुटपाथवर चढला. सुदैवाने ट्रक फुटपाथवर आल्यानंतर थांबला आणि मोठी दुर्घटना टळली.

मिळालेल्या माहितीनुसार, ट्रक चालकाने पुलाखाली वाहन उभे करून बाहेर पाऊल टाकले होते. हँडब्रेक लावण्यात आला होता, मात्र काही वेळानंतर ट्रक जागेवरून हलत फुटपाथ ओलांडत पुढे गेला. समोर असलेल्या दुकानाच्या दिशेने ट्रक गेल्याने काही काळ परिसरात भीतीचे वातावरण निर्माण झाले होते.

दुपारची वेळ असल्याने त्या ठिकाणी प्रवाशांची गर्दी कमी होती. अन्यथा मोठ्या प्रमाणात जीवितहानी होण्याची शक्यता व्यक्त केली जात आहे.

भांडुप स्थानकाबाहेरील परिसर यापूर्वीही वाहतूक कोंडी आणि अपघातांच्या धोक्यासाठी चर्चेत राहिला आहे. गतवर्षी याच परिसरात झालेल्या भीषण बेस्ट बस अपघातात चार नागरिकांचा मृत्यू झाला होता. त्यानंतर प्रशासनाकडून काही उपाययोजना जाहीर करण्यात आल्या होत्या. मात्र स्थानिक नागरिकांच्या मते, कायमस्वरूपी सुरक्षा उपायांची अंमलबजावणी अद्याप प्रभावीपणे झालेली नाही.

या घटनेनंतर ईशान्य मुंबई महाविकास आघाडीचे खासदार Sanjay Dina Patil यांनी प्रशासनावर टीका करत नागरिकांच्या सुरक्षेबाबत गंभीर प्रश्न उपस्थित केले.

त्यांनी भविष्यात अशा घटना टाळण्यासाठी संबंधित ठिकाणी मजबूत स्टील स्टॉपर तसेच सुरक्षा संरक्षक तातडीने बसविण्याची मागणी केली. नागरिकांच्या सुरक्षेसाठी दीर्घकालीन उपाययोजना आवश्यक असल्याचेही त्यांनी नमूद केले.

स्थानिक नागरिकांनीही प्रशासनाविरोधात नाराजी व्यक्त करत अपघातानंतर उपाययोजना करण्यापेक्षा आधीच प्रतिबंधात्मक सुरक्षा व्यवस्था उभारण्याची गरज व्यक्त केली.

भांडुप स्थानकाबाहेरील परिसरातील वाहतूक सुरक्षेबाबत आता प्रशासन कोणती पावले उचलते, याकडे नागरिकांचे लक्ष लागले आहे.