DRUGS FREE MUMBAI’ अभियानांतर्गत चेंबूरमध्ये नशामुक्ती रॅली; ४०० ते ४५० नागरिकांचा उत्स्फूर्त सहभाग

मुंबई ब्यूरो :  अनिल सावरे 

मुंबई, दि. १४ ऑगस्ट २०२६ : मुख्यमंत्री महाराष्ट्र राज्य यांच्या ‘DRUGS FREE MUMBAI अभियान 2026’ अंतर्गत आणि माननीय पोलीस आयुक्त, बृहन्मुंबई यांच्या मार्गदर्शनाखाली चेंबूर परिसरात नशामुक्ती जनजागृती रॅलीचे आयोजन करण्यात आले. माननीय अप्पर पोलीस आयुक्त, पूर्व प्रादेशिक विभाग, माननीय पोलीस उपायुक्त, पूर्व परिमंडळ-१ आणि चेंबूर पोलीस ठाण्याचे वरिष्ठ पोलीस निरीक्षक यांच्या आयोजनाखाली ही रॅली पार पडली.

रॅलीला मुंबई पब्लिक स्कूल, सुभाष नगर मनपा हिंदी शाळा, चेंबूर येथून सकाळी १०.५० वाजता सुरुवात झाली. त्यानंतर रॅली सुभाष नगर परिसरातील रोड क्रमांक ११ मार्गे सेंट्रल अव्हेन्यू रोडवरून पुढे जात डॉ. बाबासाहेब आंबेडकर उद्यान येथे सकाळी ११.३५ वाजता शांततेत समाप्त झाली.

४०० ते ४५० नागरिकांचा सहभाग

नशामुक्त महाराष्ट्र आणि नशामुक्त देश घडविण्याच्या उद्देशाने आयोजित करण्यात आलेल्या या रॅलीत चेंबूर परिसरातील स्वयंसेवक संघटनांचे पदाधिकारी, मोहल्ला कमिटी सदस्य, शांतता कमिटी सदस्य, प्रतिष्ठित नागरिक, शाळेतील विद्यार्थी तसेच चेंबूर पोलीस ठाण्याचे अधिकारी व अंमलदार मोठ्या संख्येने सहभागी झाले.

रॅलीमध्ये सुमारे ४०० ते ४५० स्त्री-पुरुष, स्थानिक नागरिक आणि विद्यार्थी सहभागी झाले होते. नागरिकांनी उत्स्फूर्त सहभाग नोंदवत नशेच्या दुष्परिणामांविरोधात जनजागृतीचा संदेश दिला.

‘नशामुक्त महाराष्ट्र’च्या घोषणांनी परिसर दुमदुमला

रॅलीदरम्यान ‘नशामुक्त महाराष्ट्र’ याबाबत विविध घोषणा देण्यात आल्या. सहभागी नागरिक आणि विद्यार्थ्यांनी नशामुक्तीबाबत जनजागृती करणारे बॅनर्स आणि स्लोगन्स हातात घेतले होते.

यावेळी ‘वंदे मातरम्’ आणि ‘भारत माता की जय’ अशा देशभक्तीपर घोषणाही देण्यात आल्या. नशामुक्त समाजाच्या निर्मितीसाठी नागरिकांमध्ये जागरूकता निर्माण करण्याचा संदेश या रॅलीच्या माध्यमातून देण्यात आला.

संपूर्ण रॅली शांततेत आणि उत्साहपूर्ण वातावरणात पार पडली. नशेच्या विळख्यातून युवकांना दूर ठेवण्यासाठी तसेच समाजात नशामुक्तीबाबत जनजागृती वाढविण्यासाठी अशा उपक्रमांचे महत्त्व अधोरेखित झाले.

राजेश केवळे, वरिष्ठ पोलीस निरीक्षक, चेंबूर पोलीस ठाणे, मुंबई यांच्या माहितीनुसार ही रॅली शांततेत संपन्न झाली.