मनमाड, देवळा आणि पेठ पोटनिवडणुकांचा राज्य निवडणूक आयुक्तांकडून आढावा; शांततेत मतदान प्रक्रिया पार पाडण्याचे निर्देश

नाशिक, ब्युरो : मनमाड नगरपरिषद तसेच देवळा आणि पेठ नगरपंचायतीतील रिक्त पदांसाठी होणाऱ्या पोटनिवडणुकांच्या पार्श्वभूमीवर राज्य निवडणूक आयुक्त दिनेश वाघमारे यांनी निवडणूक तयारीचा सविस्तर आढावा घेतला. मतदान प्रक्रिया शांततेत, पारदर्शक आणि सुरळीत पार पाडण्यासाठी सर्व विभागांनी समन्वयाने काम करावे, असे निर्देश त्यांनी दिले.

मनमाड नगरपरिषद तसेच देवळा आणि पेठ नगरपंचायतीतील रिक्त जागांसाठी २० जून २०२६ रोजी मतदान होणार आहे. या पार्श्वभूमीवर जिल्हाधिकारी कार्यालयात आयोजित बैठकीत निवडणूक व्यवस्थेचा आढावा घेण्यात आला.

यावेळी जिल्हाधिकारी आयुष प्रसाद, पोलीस अधीक्षक (ग्रामीण) डॉ. डी.एस. स्वामी, उपजिल्हाधिकारी शुभांगी भारदे, नगरपालिका शाखेचे सहआयुक्त शाम गोसावी, सहाय्यक आयुक्त स्नेहल विसपुते, मनमाड नगरपरिषदेचे मुख्याधिकारी शेषराव चौधरी, पेठ नगरपंचायतीचे मुख्याधिकारी चेतन विसपुते आणि देवळा नगरपंचायतीचे मुख्याधिकारी प्रमोद ढोरजकर उपस्थित होते.

बैठकीत मनमाड नगरपरिषदेमधील २ पदे, देवळा नगरपंचायतीतील १ पद आणि पेठ नगरपंचायतीतील १ पद अशा एकूण ४ रिक्त जागांसाठी होणाऱ्या पोटनिवडणुकांची तयारी, मनुष्यबळ, साहित्य आणि मतदान व्यवस्थेचा आढावा घेण्यात आला.

राज्य निवडणूक आयुक्तांनी संवेदनशील आणि अतिसंवेदनशील मतदान केंद्रांची माहिती घेत विशेष उपाययोजनांबाबत अधिकाऱ्यांना निर्देश दिले. तसेच निवडणूक काळातील कायदा आणि सुव्यवस्था राखण्यासाठी आवश्यक नियोजनावर भर देण्यात आला.

मतदान केंद्रांवर मतदारांना कोणतीही अडचण येऊ नये यासाठी पिण्याचे पाणी, वीज, स्वच्छतागृह, रॅम्प आणि दिव्यांग मतदारांसाठी आवश्यक सुविधा उपलब्ध करून देण्याबाबतही तयारीचा आढावा घेण्यात आला.

याशिवाय मतदान केंद्रांची संख्या, मतदारसंख्या, प्राप्त नामनिर्देशन पत्रे, निवडणूक प्रक्रियेसाठी लागणारे मनुष्यबळ, प्रशिक्षण व्यवस्था आणि निवडणूक साहित्य उपलब्धतेची माहिती संबंधित विभागांकडून घेण्यात आली.

यावेळी जिल्हाधिकारी आयुष प्रसाद यांनी जिल्ह्यातील पोटनिवडणुकांसाठी करण्यात आलेल्या तयारीची माहिती दिली. तर पोलीस अधीक्षक (ग्रामीण) डॉ. डी.एस. स्वामी यांनी कायदा आणि सुव्यवस्था राखण्यासाठी करण्यात आलेल्या उपाययोजनांचा आढावा सादर केला.

राज्य निवडणूक आयुक्त दिनेश वाघमारे यांनी सर्व यंत्रणांनी परस्पर समन्वय राखून नियोजनबद्ध पद्धतीने काम करावे आणि मतदारांना आवश्यक सुविधा उपलब्ध करून देण्यावर विशेष भर द्यावा, असे निर्देश यावेळी दिले.