मुंबईत ११ ऑगस्टपासून २४ तास पाणीपुरवठ्यावर परिणाम; एच पूर्व विभागाचा पाणीपुरवठा पूर्णपणे बंद राहणार

प्रतिनिधी : नरेश शिंदे 

मुंबई | दि. ६ ऑगस्ट २०२६

मुंबईतील के दक्षिण आणि एच पूर्व विभागातील पाणीपुरवठा व्यवस्था सुधारण्यासाठी बृहन्मुंबई महानगरपालिकेकडून महत्त्वाचे काम हाती घेण्यात येणार आहे. या कामाच्या पार्श्वभूमीवर मंगळवार, ११ ऑगस्ट २०२६ रोजी सकाळी १० वाजल्यापासून बुधवार, १२ ऑगस्ट २०२६ रोजी सकाळी १० वाजेपर्यंत काही भागातील पाणीपुरवठ्यावर परिणाम होणार आहे.

या कालावधीत २४०० मिलीमीटर व्यासाची वैतरणा जलवाहिनी अंशतः खंडित करण्याचे काम करण्यात येणार आहे. त्यामुळे के दक्षिण विभागातील काही परिसरात ठराविक वेळेत कमी दाबाने पाणीपुरवठा होणार असून, एच पूर्व विभागातील काही भागात पाणीपुरवठा पूर्णपणे बंद राहणार आहे.

के दक्षिण विभागातील या भागांत कमी दाबाने पाणी

महापालिकेच्या माहितीनुसार, के दक्षिण विभागातील कबीर नगर, बामणवाडा, पारसीवाडा, विमानतळ क्षेत्र, तरुण भारत वसाहत, इस्लामपूरा, देऊळवाडी, मासळी बाजार, घाटीवाडा, चकाला आणि पी अँड टी वसाहत या भागांमध्ये मंगळवार, ११ ऑगस्ट रोजी दुपारी २ ते सायंकाळी ५.३० या वेळेत कमी दाबाने पाणीपुरवठा होईल.

तसेच कोलडोंगरी, ओल्ड पोलीस लेन, विजय नगर (सहार रोड) आणि मोगरापाडा या भागांमध्ये मंगळवारी सायंकाळी ५ ते रात्री १० या वेळेत कमी दाबाने पाणीपुरवठा होणार आहे.

बुधवार, १२ ऑगस्ट रोजी सहार गाव, सुतार पाखडी आणि कार्गो संकुल या भागांमध्ये सकाळी ५ ते ८ या वेळेत कमी दाबाने पाणीपुरवठा होणार आहे.

एच पूर्व विभागातील पाणीपुरवठा बंद

या कामामुळे एच पूर्व विभागातील देशांतर्गत विमानतळ, हँगर कर्मचारी वसाहत, एअर इंडिया वसाहत, सांताक्रूझ पूर्व, वांद्रे रेल्वे टर्मिनस आणि वांद्रे-कुर्ला संकुल (वांद्रे पूर्व) या परिसरांमध्ये ११ ते १२ ऑगस्टदरम्यान पाणीपुरवठा पूर्णपणे बंद राहणार आहे.

याशिवाय बुधवार, १२ ऑगस्ट २०२६ रोजी संपूर्ण एच पूर्व विभागासह सांताक्रूझ पूर्व, खार पूर्व आणि वांद्रे पूर्व परिसरातील पाणीपुरवठाही पूर्णपणे बंद राहणार असल्याचे महापालिकेने कळविले आहे.

नागरिकांनी पाण्याचा साठा करून ठेवण्याचे आवाहन

पाणीपुरवठा खंडित होणार असल्याने संबंधित परिसरातील नागरिकांनी आवश्यकतेनुसार पाण्याचा पुरेसा साठा करून ठेवावा, असे आवाहन महापालिका प्रशासनाने केले आहे.

तसेच उपलब्ध पाण्याचा काटकसरीने वापर करून महापालिकेला सहकार्य करावे, अशी विनंती करण्यात आली आहे.

काही दिवस पाणी उकळून-गाळून पिण्याचा सल्ला

महापालिकेने खबरदारीचा उपाय म्हणून पाणीपुरवठा सुरळीत झाल्यानंतर पुढील काही दिवस पाणी उकळून आणि गाळून प्यावे, असेही नागरिकांना आवाहन केले आहे.

जलवाहिनीच्या देखभाल व दुरुस्तीच्या कामामुळे तात्पुरता पाणीपुरवठा विस्कळीत होणार असला तरी या कामानंतर संबंधित विभागातील पाणीपुरवठा व्यवस्था अधिक सक्षम आणि सुधारण्यास मदत होणार आहे.

महापालिकेच्या या कामाच्या कालावधीत नागरिकांनी पाण्याचा योग्य साठा करून ठेवावा आणि पाण्याचा काटकसरीने वापर करून प्रशासनास सहकार्य करावे, असे आवाहन बृहन्मुंबई महानगरपालिका प्रशासनाने केले आहे.