पद्मश्री रघुवीर खेडकर यांचे संगमनेरमध्ये जल्लोषात स्वागत; “हा तमाशा क्षेत्रातील प्रत्येक कलावंताचा सन्मान” – आमदार सत्यजीत तांबे

नाशिक ब्युरो | प्रतिनिधी

संगमनेरच्या सांस्कृतिक इतिहासातील अभिमानाचा क्षण ठरलेल्या पद्मश्री पुरस्कार विजेते रघुवीर खेडकर यांचे संगमनेरमध्ये उत्साहपूर्ण वातावरणात स्वागत करण्यात आले. या विशेष कार्यक्रमात आमदार सत्यजीत तांबे यांनी त्यांचा सत्कार करत गौरवोद्गार व्यक्त केले. कार्यक्रमाला संगमनेर नगराध्यक्षा मैथिली तांबे यांचीही प्रमुख उपस्थिती होती.

यावेळी बोलताना आमदार सत्यजीत तांबे म्हणाले, “ज्या दिवशी दूरदर्शनवर पद्मश्री पुरस्काराची घोषणा झाली, त्या दिवसापासून संपूर्ण संगमनेरकरांसाठी तो अभिमानाचा क्षण ठरला. संगमनेरचा पहिला पद्मश्री म्हणून मिळालेला हा सन्मान संपूर्ण शहरासाठी गौरवाची बाब आहे. आज प्रत्यक्ष पद्मश्री पदक संगमनेरमध्ये येताना पाहून अंगावर काटा उभा राहतो.”

त्यांनी रघुवीर खेडकर यांच्या परिवारातील जपलेली माणुसकी, ऋणानुबंध आणि सामाजिक बांधिलकीचाही विशेष उल्लेख केला. कराड येथे दौऱ्यादरम्यान माजी खासदार श्रीनिवास पाटील यांच्याशी झालेल्या चर्चेचा उल्लेख करत त्यांनी सांगितले की, रघुवीर खेडकर यांच्या आई आणि ज्येष्ठ लोककलावंत कांताबाई खेडकर यांनी कठीण काळात मदतीसाठी श्रीनिवास पाटील यांच्याकडे धाव घेतली होती.

“त्या काळात मिळालेली मदत कांताबाईंनी आयुष्यभर स्मरणात ठेवली. ज्यांनी संकटात साथ दिली, त्यांना कधीही विसरायचे नाही, हा त्यांच्या परिवाराचा मोठेपणा आहे,” असे आमदार तांबे म्हणाले.

“पहिला मान गावाचा आणि नंतर परिवाराचा,” अशी भावना जपणाऱ्या खेडकर परिवाराच्या मोठेपणाचे कौतुक करताना त्यांनी सांगितले की, ही मूल्ये त्यांच्या कलेत, स्वभावात आणि वागण्या-बोलण्यातही स्पष्टपणे दिसून येतात.

देशातील सर्वोच्च नागरी सन्मानांपैकी एक असलेला पद्मश्री पुरस्कार हा केवळ रघुवीर खेडकर यांचा वैयक्तिक सन्मान नसून तमाशा आणि लोककला क्षेत्रात कार्य करणाऱ्या प्रत्येक कलावंताचा गौरव असल्याचेही त्यांनी अधोरेखित केले.

“या सन्मानामुळे तमाशा आणि लोककला क्षेत्राला नवसंजीवनी मिळेल. येत्या काळात लोककला क्षेत्रासाठी अधिक चांगले दिवस येतील,” असा विश्वास आमदार सत्यजीत तांबे यांनी व्यक्त केला.

संगमनेरच्या सांस्कृतिक परंपरेला राष्ट्रीय स्तरावर गौरव मिळाल्याने नागरिकांमध्येही उत्साहाचे वातावरण असून, हा सन्मान संपूर्ण शहरासाठी अभिमानाचा क्षण ठरत आहे.