आरोग्य यंत्रणेच्या बळकटीसाठी निधीचे योग्य नियोजन करा – आरोग्य राज्यमंत्री मेघना साकोरे-बोडीकर

मुंबई, दि. २२ : राज्यातील आरोग्य यंत्रणा अधिक सक्षम करण्यासाठी निधीचे योग्य नियोजन करण्याचे निर्देश आरोग्य राज्यमंत्री मेघना साकोरे-बोडीकर यांनी दिले. तसेच रुग्णांना औषधांसाठी बाहेर जाऊन खरेदी करण्याची वेळ येऊ नये, यासाठी प्रभावी उपाययोजना करण्यावर त्यांनी भर दिला.

आरोग्य भवन येथे सन २०२५-२६ या आर्थिक वर्षातील राज्य निधी तसेच राष्ट्रीय आरोग्य अभियान (NHM) अंतर्गत मिळालेल्या निधीच्या नियोजनाबाबत आढावा बैठक पार पडली. यावेळी विविध महत्त्वाच्या मुद्द्यांवर सविस्तर चर्चा करण्यात आली.

राज्यमंत्री बोडीकर यांनी सांगितले की, आरोग्य सेवेची प्रभावी अंमलबजावणी ही शासनाची प्राथमिकता असून प्रत्येक जिल्हास्तरावर सेवा अधिक मजबूत करणे आवश्यक आहे. थॅलेसेमिया रुग्णांना नियमितपणे दिव्यांग प्रमाणपत्र देण्याचे निर्देशही त्यांनी दिले.

बैठकीत महाराष्ट्र राज्य औषधी द्रव्ये व साहित्य खरेदी प्राधिकरणाच्या कामकाजाचा आढावा घेण्यात आला. २०२४ ते २०२६ या कालावधीत औषधे व यंत्रसामग्री खरेदी प्रक्रियेचे परीक्षण करण्यात आले. तसेच चालू वर्षातील नियोजन, खर्च आणि रेट कॉन्ट्रॅक्ट प्रक्रियेच्या अंमलबजावणीवरही चर्चा झाली.

राज्यातील आरोग्य संस्थांमध्ये महिलांच्या आरोग्यासाठी पीसीओडी (PCOD) क्लिनिक सुरू करण्याचा प्रस्तावही चर्चेत आला. हा उपक्रम महिलांच्या आरोग्याच्या दृष्टीने महत्त्वपूर्ण ठरणार असल्याचे नमूद करण्यात आले.

“एक पाऊल थॅलेसेमिया मुक्तीकडे” या अभियानाच्या वर्षपूर्ती निमित्त सविस्तर आढावा घेण्यात आला. थॅलेसेमिया हा अनुवांशिक आजार असून रुग्णांना नियमित रक्त संक्रमणाची आवश्यकता भासते. या आजाराचा प्रसार रोखण्यासाठी विवाहपूर्व समुपदेशन अत्यंत आवश्यक असल्याचे सांगत वधू-वर सूचक मंडळांमार्फत जनजागृती करण्याच्या सूचना देण्यात आल्या.

यावेळी कार्यक्रमनिहाय अंदाजपत्रक, खर्च आणि आवश्यक निधी यावरही सखोल चर्चा करण्यात आली. बैठकीस आरोग्य सेवा आयुक्त तथा राष्ट्रीय आरोग्य अभियानाच्या संचालक डॉ. कादंबरी बलकवडे, आरोग्य सेवा संचालक डॉ. विजय कुंडेवाड यांच्यासह संबंधित वरिष्ठ अधिकारी उपस्थित होते.