धीरेंद्र कृष्ण शास्त्री यांचा नाशिक दौरा रद्द करण्याची अंनिसची मागणी; जिल्हाधिकाऱ्यांना निवेदन

नाशिक प्रतिनिधी : धीरेंद्र कृष्ण शास्त्री उर्फ बागेश्वर धाम बाबा यांचा २ मे रोजी नाशिक येथे आयोजित कार्यक्रम रद्द करावा, अशी मागणी महाराष्ट्र अंधश्रद्धा निर्मूलन समितीने (अंनिस) केली आहे. यासंदर्भात समितीने जिल्हाधिकाऱ्यांना निवेदन दिले आहे.

अंनिसच्या निवेदनात धीरेंद्र कृष्ण शास्त्री यांच्यावर चमत्कारसदृश्य दावे करून अंधश्रद्धेला खतपाणी घालण्याचा तसेच महाराष्ट्रातील संत आणि महापुरुषांविषयी आक्षेपार्ह वक्तव्ये केल्याचा आरोप करण्यात आला आहे.

महापुरुषांबाबत वक्तव्यांचा आरोप

निवेदनात पुढे म्हटले आहे की, धार्मिक कथा-प्रवचनांच्या नावाखाली महाराष्ट्रात येऊन ते संत तुकाराम महाराज आणि छत्रपती शिवाजी महाराज यांच्याबद्दल अपशब्द वापरतात. हा केवळ महापुरुषांचा नव्हे तर संपूर्ण महाराष्ट्राचा अपमान असल्याचे अंनिसने म्हटले आहे.

चमत्कारिक दाव्यांवर आव्हान

अंनिसने धीरेंद्र कृष्ण शास्त्री यांच्या मनातील प्रश्न ओळखण्याच्या आणि दैवी उत्तर देण्याच्या दाव्यांवरही प्रश्नचिन्ह उपस्थित केले आहे. हे दावे भारतीय संविधानातील वैज्ञानिक दृष्टिकोनाच्या मूल्यांशी विसंगत असल्याचा दावा करण्यात आला आहे.

समितीने त्यांना महाराष्ट्र अंनिसच्या अटी-शर्तींनुसार तज्ज्ञ, शासकीय अधिकारी, पोलीस, पत्रकार यांच्या उपस्थितीत वैज्ञानिक कसोटीवर हे दावे सिद्ध करण्याचे खुले आव्हान दिले आहे.

अंनिसने सांगितले की, जर त्यांनी हे दावे सिद्ध केले तर समितीकडून २१ लाख रुपयांचे पारितोषिक देण्यात येईल.

कार्यक्रम रद्द न झाल्यास आंदोलनाचा इशारा

निवेदनात कार्यक्रम रद्द न झाल्यास अंनिस आणि समविचारी संघटना लोकशाही मार्गाने व शांततेत आंदोलन करतील, असा इशारा देण्यात आला आहे.

या निवेदनावर अंनिसचे राज्य प्रधान सचिव डॉ. टी. आर. गोराणे, राज्य कार्यवाह कृष्णा चांदगुडे आणि बुवाबाजी संघर्ष विभागाचे महेंद्र दातरंगे यांच्या स्वाक्षऱ्या आहेत.