आषाढी वारी २०२६ पूर्वतयारीला वेग; उपमुख्यमंत्री सुनेत्रा पवार यांना वारकऱ्यांच्या सुविधांबाबत निवेदन

नाशिक ब्यूरो

मुंबई : आषाढी वारी २०२६ च्या पूर्वतयारीसंदर्भात राज्य शासनाच्या वतीने विधानभवन, मुंबई येथे मुख्यमंत्री देवेंद्र फडणवीस यांच्या अध्यक्षतेखाली महत्त्वपूर्ण बैठक आयोजित करण्यात आली.

या बैठकीदरम्यान राज्याच्या उपमुख्यमंत्री सुनेत्राताई अजितदादा पवार यांना पालखी सोहळ्यात सहभागी होणाऱ्या लाखो वारकऱ्यांसाठी आवश्यक सोयी-सुविधा उपलब्ध करून देण्याबाबत निवेदन सादर करण्यात आले. वारकऱ्यांच्या सुरक्षित, सुसूत्र आणि सुविधायुक्त प्रवासासाठी शासनाने आवश्यक उपाययोजना कराव्यात, अशी मागणी यामध्ये करण्यात आली.

बैठकीस विविध मंत्री, शासनाचे वरिष्ठ अधिकारी तसेच आषाढी वारीतील मानाच्या १० पालखी सोहळ्यांचे प्रतिनिधी उपस्थित होते. आषाढी वारीच्या पार्श्वभूमीवर वाहतूक व्यवस्था, पिण्याचे पाणी, स्वच्छता, आरोग्य सेवा, सुरक्षा, निवास व्यवस्था आणि इतर मूलभूत सुविधांबाबत सविस्तर चर्चा करण्यात आली.

राज्य शासनाच्या समन्वयातून यंदाची आषाढी वारी अधिक सुरक्षित, नियोजनबद्ध आणि वारकरी-केंद्रित करण्यासाठी आवश्यक उपाययोजना करण्यात येणार असल्याचे बैठकीत अधोरेखित करण्यात आले.