महापौर कार्यालयाच्या सोशल मीडिया हाताळणीसाठी स्वतंत्र २५ लाखांचा खर्च नाही; BMCकडून वस्तुस्थिती स्पष्ट

प्रतिनिधी: नरेश शिंदे 

मुंबई, दि. १९ ऑगस्ट २०२६ : मुंबईच्या महापौरांसाठी प्रसिद्धीकरिता २५ लाख रुपये खर्च केले जाणार असल्याच्या वृत्तांवर बृहन्मुंबई महानगरपालिकेने स्पष्टीकरण देत हा दावा वस्तुस्थितीला धरून नसल्याचे स्पष्ट केले आहे. महापौर कार्यालयाच्या सोशल मीडिया हाताळणीसाठी स्वतंत्र संस्था नियुक्त करण्यात आलेली नसून, संपूर्ण महानगरपालिकेच्या सोशल मीडिया व्यवस्थापनासाठी यापूर्वीच नियुक्त करण्यात आलेल्या संस्थेमार्फतच आवश्यक तांत्रिक मनुष्यबळ उपलब्ध करून दिले जाते, असे महापौर कार्यालयाच्या वतीने सांगण्यात आले.

महानगरपालिकेची myBMC यासह विविध सोशल मीडिया माध्यमे कार्यान्वित आहेत. ही माध्यमे प्रभावीपणे हाताळण्यासाठी तांत्रिक मनुष्यबळाची आवश्यकता असते. त्यासाठी महानगरपालिकेने विहित निविदा प्रक्रिया राबवून मेसर्स रनटाईम सोल्युशन्स प्रायव्हेट लिमिटेड या संस्थेची सुमारे दोन वर्षांपूर्वी नियुक्ती केली आहे.

संपूर्ण BMCच्या सोशल मीडिया व्यवस्थापनासाठी नियुक्त संस्था

सदर संस्था महानगरपालिकेला आवश्यक तांत्रिक मनुष्यबळाचा पुरवठा करते. महानगरपालिकेची संपूर्ण सोशल मीडिया माध्यमे हाताळण्यासाठी या संस्थेला ऑगस्ट २०२६ ते जुलै २०२७ या कालावधीसाठी एक वर्षाची मुदतवाढ देण्याचा प्रस्ताव यापूर्वीच स्थायी समितीमध्ये मंजूर करण्यात आला आहे.

त्यामुळे ही नियुक्ती केवळ महापौर कार्यालयाच्या सोशल मीडिया व्यवस्थापनासाठी नसून संपूर्ण बृहन्मुंबई महानगरपालिकेच्या सोशल मीडिया व्यवस्थापनाशी संबंधित असल्याचे महापौर कार्यालयाने स्पष्ट केले.

महापौर कार्यालयासाठी स्वतंत्र संस्था नियुक्त केलेली नाही

याच नियुक्त संस्थेमार्फत महापौर कार्यालयाच्या सोशल मीडिया माध्यमांसाठीही आवश्यक तांत्रिक मनुष्यबळ उपलब्ध करून दिले जाते आणि सोशल मीडिया हाताळला जातो.

महापौरांनी यासाठी स्वतंत्र संस्था नियुक्त करण्याची अथवा स्वतंत्र प्रसिद्धी कार्ये करण्याची कोणतीही सूचना केलेली नाही, असेही महापौर कार्यालयाच्या वतीने स्पष्ट करण्यात आले आहे.

‘२५ लाखांचा स्वतंत्र प्रसिद्धी खर्च’ असा अर्थ काढू नये

महापौरांच्या प्रसिद्धीसाठी २५ लाख रुपये स्वतंत्रपणे खर्च केले जाणार असल्याचे चित्र निर्माण करणाऱ्या वृत्तांबाबत महापौर कार्यालयाने नाराजी व्यक्त केली आहे.

महानगरपालिकेच्या संपूर्ण सोशल मीडिया व्यवस्थापनासाठी आधीपासून अस्तित्वात असलेल्या व्यवस्थेअंतर्गत तांत्रिक मनुष्यबळाचा पुरवठा केला जात असून, त्याचा केवळ महापौरांच्या प्रसिद्धीसाठी स्वतंत्र खर्च म्हणून अर्थ काढू नये, असे स्पष्ट करण्यात आले आहे.

“कृपया वस्तुस्थितीचा विपर्यास करू नये,” अशी विनंती महापौर कार्यालयाच्या वतीने करण्यात आली आहे.

या स्पष्टीकरणामुळे महापौर कार्यालयाच्या सोशल मीडिया हाताळणीसाठी स्वतंत्रपणे २५ लाख रुपयांचा प्रसिद्धी खर्च मंजूर करण्यात आल्याच्या चर्चेला BMCकडून पूर्णविराम देण्याचा प्रयत्न करण्यात आला आहे.