बृहन्मुंबई महानगरपालिकेचा विक्रमी मालमत्ता कर संकलनाचा नवा इतिहास – 7,610 कोटींचा टप्पा पार

बृहन्मुंबई महानगरपालिका जनसंपर्क विभाग
दिनांक: १ एप्रिल २०२६

बृहन्मुंबई महानगरपालिकेच्या वतीने आर्थिक वर्ष २०२५-२६ मध्ये मालमत्ता कर संकलनात ऐतिहासिक विक्रम नोंदविण्यात आला असून, एकूण ₹७ हजार ६१० कोटी ९० लाख इतका महसूल जमा करण्यात आला आहे. महानगरपालिकेच्या इतिहासात प्रथमच मालमत्ता करातून एवढ्या उच्चांकी टप्प्याची नोंद झाली आहे.

करनिर्धारण व संकलन विभागाने यंदा उल्लेखनीय कामगिरी करत पूर्वीचे सर्व विक्रम मोडीत काढले आहेत. निर्धारित ₹७ हजार ३४१ कोटींच्या सुधारित उद्दिष्टाच्या तुलनेत १०३.६८ टक्के इतके संकलन करण्यात आले आहे. विशेष म्हणजे, ३१ मार्च २०२६ रोजी एकाच दिवशी ₹३९९ कोटी ७४ लाख इतका महसूल जमा करून नवीन विक्रम प्रस्थापित करण्यात आला.

महानगरपालिका आयुक्त आश्विनी भिडे यांनी या यशस्वी कामगिरीबद्दल अधिकारी व कर्मचाऱ्यांचे कौतुक केले आहे.

मुंबईकर नागरिकांना विविध नागरी सेवा आणि सुविधा पुरविण्यासाठी मालमत्ता कर हा अत्यंत महत्त्वाचा व विश्वासार्ह महसुली स्रोत आहे. या पार्श्वभूमीवर अतिरिक्त आयुक्त डॉ. अश्विनी जोशी, सह आयुक्त विश्वास शंकरवार आणि करनिर्धारक व संकलक गजानन बेल्लाळे यांच्या मार्गदर्शनाखाली व्यापक प्रयत्न करण्यात आले.

महानगरपालिका निवडणुकीचे जबाबदारीचे काम पूर्ण करूनही कर्मचाऱ्यांनी सातत्याने मेहनत घेतली. नागरिकांमध्ये जनजागृती, ऑनलाइन कर भरणा सुविधा, सुटीच्या दिवशीही सुविधा केंद्र सुरू ठेवणे, तसेच मोठ्या थकबाकीदारांवर कारवाई यामुळे संकलनाला गती मिळाली.

अतिरिक्त दंडाच्या स्वरूपात ₹३०१ कोटी १३ लाख इतकी रक्कमही जमा करण्यात आली आहे.

विभागनिहाय कामगिरी

सर्वाधिक संकलन करणारे विभाग:

• के पूर्व – ₹७१९.२३ कोटी
• जी दक्षिण – ₹६७०.६४ कोटी
• के पश्चिम – ₹६२२.१६ कोटी
• एच पूर्व – ₹५७२.७८ कोटी
• एच पश्चिम – ₹५३६.५५ कोटी

एकूण संकलन (विभागनिहाय)

• शहर विभाग: ₹२,१०२.६० कोटी
• पश्चिम उपनगरे: ₹३,७२१.३३ कोटी
• पूर्व उपनगरे: ₹१,४५७.४१ कोटी

या विक्रमी संकलनामुळे मुंबईतील पायाभूत सुविधा, स्वच्छता, आरोग्य सेवा आणि नागरी विकास प्रकल्पांना मोठी चालना मिळणार आहे.