धावत्या गाडीत दिवा लावणाऱ्या प्रवाशावर मध्य रेल्वेची कठोर कारवाई; ५ वर्षांपर्यंत कारावासाची तरतूद

नाशिक ब्यूरो 

मुंबई : धावत्या रेल्वेगाडीत उघडा दिवा लावून पूजा करणाऱ्या एका प्रवाशावर मध्य रेल्वेने कठोर कारवाई केली आहे. गाडीत ज्वलनशील वस्तू बाळगणे अथवा दिवा, मेणबत्ती किंवा अगरबत्ती पेटविणे यामुळे आग लागण्याचा धोका निर्माण होऊ शकतो. त्यामुळे प्रवाशांनी अशा प्रकारचे कृत्य करू नये, असे आवाहन मध्य रेल्वेने केले आहे.

हजरत निजामुद्दीन-म्हैसूर एक्सप्रेसमध्ये घटना

दिनांक ३१ ऑगस्ट २०२६ रोजी गाडी क्रमांक १२७८२ हजरत निजामुद्दीन-म्हैसूर एक्सप्रेसच्या ए-१ कोचमधील बर्थ क्रमांक १७ वर एका प्रवाशाने दिवा लावून पूजा केल्याची माहिती भुसावळ येथील कमर्शियल कंट्रोलकडून मिळाली.

खंडवा येथे कर्तव्यावर असलेले तिकीट तपासनीस रमन कुमार शर्मा यांनी या घटनेची माहिती दिली. त्यानंतर पुढील आवश्यक कारवाईसाठी संबंधित प्रवाशाला भुसावळ रेल्वे स्थानकावर गाडीतून उतरविण्यात आले.

दिवा विझविण्याचा सल्ला; मात्र प्रवाशाचा नकार

चौकशीदरम्यान संबंधित प्रवाशाची ओळख गरिबा, वय ५५ वर्षे, रा. ग्वाल्हेर, मध्य प्रदेश अशी पटली. सायंकाळची प्रार्थना करताना आपण आरक्षित बर्थवर दिवा लावल्याचे त्याने सांगितले.

कर्तव्यावर असलेल्या टीटीईने त्याला दिवा तात्काळ विझविण्याचा सल्ला दिला. धावत्या गाडीत उघडी ज्योत ठेवल्यामुळे आग लागण्याची शक्यता असून त्यामुळे प्रवाशांसह रेल्वेच्या मालमत्तेलाही धोका निर्माण होऊ शकतो, असे त्याला समजावून सांगण्यात आले.

मात्र, संबंधित प्रवाशाने प्रार्थना पूर्ण झाल्यानंतरच दिवा विझविण्याचा आग्रह धरला. टीटीईने या घटनेचे आपल्या मोबाईल फोनवर व्हिडिओ रेकॉर्डिंगही केले.

आगपेटी, पितळी दिवा आणि स्टीलचा डबा जप्त

घटनेनंतर संबंधित प्रवाशाकडून आगपेटी, पितळी दिवा आणि स्टीलचा डबा जप्त करण्यात आला. रेल्वे प्रशासनाच्या मते, धावत्या गाडीत उघड्या ज्योतीचा वापर करणे ही प्रवाशांच्या तसेच रेल्वेच्या मालमत्तेच्या सुरक्षिततेच्या दृष्टीने गंभीर बाब आहे.

रेल्वे कायद्यानुसार कारवाई

या प्रकरणात १ सप्टेंबर २०२६ रोजी रेल्वे कायदा, १९८९ मधील कलम १५३ आणि १४५(ब) अन्वये कारवाई करण्यात आली. आवश्यक कायदेशीर प्रक्रिया पूर्ण केल्यानंतर संबंधित आरोपीला भारतीय न्याय संहितेच्या कलम ३५(क) अन्वये नोटीस देऊन सोडण्यात आले.

रेल्वेत ज्वलनशील वस्तू बाळगणे टाळा

मध्य रेल्वेने सर्व प्रवाशांना गाडीत कोणत्याही प्रकारच्या ज्वलनशील वस्तू बाळगू नयेत, तसेच दिवे, मेणबत्त्या किंवा अगरबत्ती पेटवू नयेत, असे आवाहन केले आहे.

धावत्या रेल्वेत उघड्या ज्योतीमुळे आग लागल्यास मोठी दुर्घटना घडू शकते आणि हजारो प्रवाशांच्या जीवाला धोका निर्माण होऊ शकतो. त्यामुळे धार्मिक किंवा इतर कोणत्याही कारणासाठी गाडीत उघडी ज्योत वापरणे टाळावे, असे रेल्वे प्रशासनाने स्पष्ट केले आहे.

दोषींना दंड आणि कारावासाची तरतूद

रेल्वे प्रशासनाने दिलेल्या माहितीनुसार, अशा प्रकारच्या कृत्यांसाठी रेल्वे कायद्यानुसार कारवाई होऊ शकते.

कलम १४५(ब) अंतर्गत रेल्वे परिसरातून बाहेर काढणे, पास किंवा तिकीट जप्त करणे आणि १,००० रुपयांपर्यंत दंड होऊ शकतो. ताकीद देऊनही संबंधित कृत्य पुन्हा केल्यास ६ महिन्यांपर्यंत कारावास किंवा ५,००० रुपयांपर्यंत दंड किंवा दोन्ही शिक्षा होऊ शकतात.

तर कलम १५३ अंतर्गत रेल्वेच्या सुरक्षिततेला धोका निर्माण करणाऱ्या कृत्यासाठी ५ वर्षांपर्यंत कारावासाची शिक्षा होऊ शकते.

मध्य रेल्वेने प्रवाशांच्या सुरक्षिततेला सर्वोच्च प्राधान्य देत रेल्वे प्रवासादरम्यान सुरक्षा नियमांचे काटेकोरपणे पालन करण्याचे आवाहन केले आहे.