राजकीय गद्दारीविरोधात माकप राज्यभर तीव्र निदर्शने करणार; पक्षांतराविरोधात जनजागृती मोहीम सुरू

नाशिक ब्यूरो 

नाशिक : महाराष्ट्रातील सहा खासदारांनी शिंदे सेनेत प्रवेश केल्यानंतर त्यांच्या पक्षांतराच्या विरोधात भारताचा कम्युनिस्ट पक्ष (मार्क्सवादी) राज्यभर तीव्र निदर्शने करणार असल्याची घोषणा पक्षाचे राज्य सचिव डॉ. अजित नवले यांनी केली आहे. पक्षांतर ही लोकशाही, धर्मनिरपेक्षता, संविधान आणि मतदारांच्या विश्वासाशी केलेली गद्दारी असल्याचा आरोप माकपने केला आहे.

प्रसिद्धीपत्रकात म्हटले आहे की, लोकसभा निवडणुकीत महाविकास आघाडीच्या उमेदवारांना विजयी करण्यासाठी माकप आणि त्याच्या जनसंघटनांनी राज्यभर प्रचार केला होता. भारतीय जनता पक्ष आणि त्यांच्या मित्रपक्षांविरोधात जनतेमध्ये असलेल्या नाराजीच्या पार्श्वभूमीवर या उमेदवारांना पाठिंबा देण्यात आला होता. मात्र निवडून आल्यानंतर संबंधित खासदारांनी सत्ताधारी आघाडीकडे जाण्याचा निर्णय घेतल्याने मतदारांचा आणि कार्यकर्त्यांचा विश्वासघात झाला आहे.

माकपने यापूर्वी झालेल्या आमदारांच्या पक्षांतराचाही उल्लेख करत अशा प्रकारच्या राजकीय घडामोडींमुळे लोकशाहीवरील जनतेचा विश्वास कमी होत असल्याचे म्हटले आहे. केवळ आर्थिक बळ आणि निवडणूक जिंकण्याची क्षमता पाहून उमेदवारी देण्याऐवजी तत्त्वनिष्ठ आणि जनतेशी बांधिलकी असलेल्या कार्यकर्त्यांना संधी देण्याची गरज असल्याचेही पक्षाने नमूद केले आहे.

पक्षाच्या मते, वारंवार होणाऱ्या पक्षांतराला आळा घालण्यासाठी जनमत तयार करणे, निवडणूक आयोग आणि इतर शासकीय यंत्रणांचा गैरवापर रोखणे तसेच व्यापक निवडणूक सुधारणा राबविणे आवश्यक आहे.

या पार्श्वभूमीवर मार्क्सवादी कम्युनिस्ट पक्ष राज्यभर जनजागृती मोहीम राबविणार असून विविध ठिकाणी निदर्शने, आंदोलन आणि गद्दारांचे प्रतीकात्मक पुतळे जाळून निषेध व्यक्त केला जाणार आहे. पक्षाच्या सर्व शाखा, जनसंघटना आणि कार्यकर्त्यांनी या मोहिमेत सक्रिय सहभाग घ्यावा, असे आवाहन डॉ. अजित नवले यांनी केले आहे.

प्रसिद्धीपत्रकात पुढे असा आरोप करण्यात आला आहे की, विकास निधीचा वापर राजकीय दबावाचे साधन म्हणून केला जात असून त्यातून संधिसाधू पक्षांतरांना प्रोत्साहन मिळत आहे. अशा प्रवृत्तीमुळे विचाराधिष्ठित राजकारणाला धक्का बसत असून लोकशाही अधिक कमकुवत होत असल्याचा दावा माकपने केला आहे.