धनगर अधिकारी कर्मचारी संघटनेचे पाचवे राज्यस्तरीय वार्षिक अधिवेशन 24 मे रोजी नाशिकमध्ये

नाशिक ब्युरो : धनगर अधिकारी कर्मचारी संघटना महाराष्ट्र राज्य यांच्या वतीने पाचवे राज्यस्तरीय वार्षिक अधिवेशन रविवार, दिनांक 24 मे 2026 रोजी नाशिक येथे आयोजित करण्यात आले आहे. राज्यभरातील धनगर समाजातील अधिकारी, कर्मचारी, पदाधिकारी, महिला प्रतिनिधी आणि युवकांनी मोठ्या संख्येने उपस्थित राहावे, असे आवाहन संघटनेच्या वतीने करण्यात आले आहे.

हे राज्यस्तरीय अधिवेशन देशपांडे बँक्वेट हॉल, स्मार्ट बाजारजवळ, म्हसोबा मंदिरामागे, प्रधाननगर, नाशिक रोड, नाशिक येथे सकाळी 11 ते सायंकाळी 6 वाजेपर्यंत होणार आहे.

अधिवेशनाचे उद्घाटन महावितरण क्षेत्रातील वरिष्ठ अधिकारी मा. श्री. अभय हरणे यांच्या हस्ते होणार असून विविध प्रशासकीय, सामाजिक आणि कर्मचारी विषयांवर परिसंवाद आयोजित करण्यात आला आहे.

कार्यक्रमाला प्रमुख अतिथी म्हणून विविध शासकीय विभागांतील वरिष्ठ अधिकारी उपस्थित राहणार आहेत. यामध्ये दत्तात्रय पडळकर, अतुल सोनजे, निवृत्ती मराळे, धनंजय सावळकर, अनिल देवकाते, डॉ. वसंतराव माने, शुभांगीताई पोटे, राहुल नाळे, संदीप हाके, नारायणराव माने, प्रताप माडकर, बाजीराव शिंदे, डॉ. संजय शिंदे, राजेंद्र काटकर, दीप्ती काळे यांच्यासह विविध क्षेत्रांतील मान्यवरांचा सहभाग असणार आहे.

अधिवेशनात धनगर समाजासमोरील विविध सामाजिक, प्रशासकीय आणि कर्मचारीविषयक प्रश्नांवर चर्चा केली जाणार आहे. यामध्ये:

पदोन्नतीमधील आरक्षण

भटक्या-विमुक्त जमातींचे प्रश्न

धनगर आरक्षणासंदर्भातील घडामोडी

कर्मचारी संघटनात्मक बळकटीकरण

महिला कर्मचारी सहभाग

समाज विकासातील अधिकारी-कर्मचाऱ्यांची भूमिका

सेवाविषयक अडचणी

सामाजिक एकजूट मजबूत करण्यासाठी उपाययोजना

या विषयांवर परिसंवाद आणि मार्गदर्शन सत्रांचे आयोजन करण्यात आले आहे.

अधिवेशनातील विविध सत्रांना संघटनेचे राज्य कार्याध्यक्ष विनोद ढोरे, वरिष्ठ उपाध्यक्ष विलास डाखोळे, संघटक नाना पांडे आणि राज्य उपाध्यक्ष संतोष सातपुते अध्यक्षस्थानी राहणार आहेत.

संघटनेचा वार्षिक अहवाल महासचिव शरद उरकुडे सादर करणार असून संघटनात्मक ठराव आणि राज्यव्यापी संघटनात्मक बांधणीसंदर्भात विशेष चर्चा होणार आहे.

कार्यक्रमाच्या यशस्वी आयोजनासाठी नाशिक जिल्ह्यातील पदाधिकारी आणि कार्यकारिणी सदस्य विशेष परिश्रम घेत आहेत.

राज्यभरातील विविध विभागांमध्ये कार्यरत अधिकारी, कर्मचारी आणि समाजबांधवांनी मोठ्या संख्येने उपस्थित राहून संघटनात्मक एकजूट अधिक मजबूत करावी, असे आवाहन आयोजक समितीच्या वतीने करण्यात आले आहे.