बनावट मोबाईल विक्री करून ॲमेझॉन कंपनीसह ग्राहकांची आर्थिक फसवणूक; गावदेवी पोलिसांची कारवाई, ४ मोबाईल हस्तगत, २ आरोपी अटक

मुंबई ब्यूरो : अनिल सावरे 

मुंबई, दि. १४ ऑगस्ट २०२६ : ॲमेझॉन ई-कॉमर्सच्या माध्यमातून विक्रीसाठी पाठविण्यात आलेल्या ओरिजनल मोबाईल फोनऐवजी बनावट मोबाईल ग्राहकांना वितरित करून ॲमेझॉन कंपनी तसेच ग्राहकांची आर्थिक फसवणूक करणाऱ्या टोळीविरुद्ध गावदेवी पोलिसांनी कारवाई केली आहे. या प्रकरणात पोलिसांनी दोन आरोपींना अटक केली असून, त्यांच्याकडून चार मोबाईल फोन हस्तगत करण्यात आले आहेत. उर्वरित सहा मोबाईल फोनचा तपास सुरू आहे.

पोलिसांनी दिलेल्या माहितीनुसार, पेडर रोड, मुंबई येथील दुकानातून ॲमेझॉन ई-कॉमर्सच्या भिवंडी येथील वेअरहाऊसमध्ये विक्रीसाठी १० ओरिजनल मोबाईल फोन पाठविण्यात आले होते. मात्र, या ओरिजनल मोबाईल फोनऐवजी बनावट मोबाईल ग्राहकांना वितरित करण्यात आल्याचे तपासात समोर आले.

या प्रकारामुळे फिर्यादीची सुमारे २१ लाख ४७ हजार ७७६ रुपयांची आर्थिक फसवणूक झाल्याचे पोलिसांनी नमूद केले आहे. याप्रकरणी गावदेवी पोलीस ठाण्यात भारतीय न्याय संहितेच्या संबंधित कलमांनुसार गुन्हा दाखल करण्यात आला आहे.

तपासात चार मोबाईल हस्तगत

गुन्ह्याचा तपास करताना फसवणूक झालेल्या एकूण १० मोबाईल फोनपैकी ४ मोबाईल फोन पोलिसांच्या हाती लागले आहेत. उर्वरित ६ मोबाईल फोन सध्या कोणत्या व्यक्तींच्या वापरात आहेत, याबाबत पोलिसांकडून सविस्तर माहिती मिळविण्याचे काम सुरू आहे.

तसेच बनावट मोबाईल फोनची विक्री करणाऱ्या आरोपींपैकी दोन आरोपींना अटक करण्यात आली असून, या प्रकरणातील पुढील तपास सुरू आहे.

अॅमेझॉनवरून महागडे फोन मागवून स्वस्त फोन परत करण्याचा प्रकार

पोलिसांच्या प्राथमिक तपासात आरोपींच्या फसवणुकीची पद्धतही समोर आली आहे. आरोपी ॲमेझॉनवरून महागडे मोबाईल फोन ऑर्डर करत होते. त्यानंतर मोबाईल फोन काहीतरी कारण सांगून रिटर्न करताना त्याच बॉक्समध्ये दुसरा स्वस्त किंवा कमी दर्जाचा मोबाईल फोन परत करून मूळ मोबाईलची संपूर्ण रक्कम परत मिळवत असल्याचे तपासात निष्पन्न झाले आहे.

या प्रकारामुळे विक्रेत्यांना मूळ मोबाईल फोन तसेच त्याची विक्री रक्कम अशा दोन्ही स्वरूपात नुकसान सहन करावे लागत होते. अशाच पद्धतीने आरोपींनी ॲमेझॉन कंपनी आणि ग्राहकांची आर्थिक फसवणूक केल्याचा संशय पोलिसांनी व्यक्त केला आहे.

दोन आरोपी अटक

या प्रकरणात पोलिसांनी मिलन घनश्यामभाई देवभूमरी (वय ३३ वर्षे) आणि प्रवीणकुमार रूपचंद ताती (वय २८ वर्षे) या दोघांना अटक केली आहे.

आरोपींकडून मिळालेल्या माहितीच्या आधारे या फसवणुकीत आणखी कोणाचा सहभाग आहे का, तसेच बनावट मोबाईल फोनचा पुरवठा कुठून केला जात होता, याचा तपास पोलिसांकडून करण्यात येत आहे.

वरिष्ठ अधिकाऱ्यांच्या मार्गदर्शनाखाली कारवाई

ही कारवाई मुंबईचे पोलीस आयुक्त देवेन भारती, सह पोलीस आयुक्त डॉ. मनोजकुमार शर्मा, अपर पोलीस आयुक्त दक्षिण प्रादेशिक विभाग शैलेश बलकवडे, पोलीस उपायुक्त दक्षिण परिमंडळ-२ श्रीमती रागसुधा आर. आणि सहाय्यक पोलीस आयुक्त गावदेवी विभाग श्रीमती सुमन चव्हाण यांच्या मार्गदर्शनाखाली करण्यात आली.

गावदेवी पोलीस ठाण्याचे वरिष्ठ पोलीस निरीक्षक प्रशांत मोहिते यांच्या मार्गदर्शनाखाली सहाय्यक पोलीस निरीक्षक प्रताप देशाई, पोलीस उपनिरीक्षक विरेंद्रसिंग खंडारे यांच्यासह पोलीस अंमलदारांच्या पथकाने ही कारवाई केली.

ऑनलाइन खरेदीच्या नावाखाली महागड्या वस्तूंची अदलाबदल करून आर्थिक फसवणूक करणाऱ्या प्रकारांवर पोलिसांकडून विशेष लक्ष ठेवण्यात येत असून, या प्रकरणातील पुढील तपास सुरू आहे.