माविमच्या कोल्हापुरी चप्पलला बाजारपेठ मिळवून देण्यासाठी जिल्हा प्रशासनाचे सहकार्य – जिल्हा नियोजन अधिकारी विक्रम देशमुख

प्रतिनिधी: उमेश जाधव 

कोल्हापूर, दि. 4 (जिमाका) : महिला आर्थिक विकास महामंडळ अर्थात माविम अंतर्गत करवीर तालुक्यातील सांगरुळ येथे सुरू करण्यात आलेल्या कोल्हापुरी चप्पल निर्मिती युनिटला व्यापक बाजारपेठ उपलब्ध करून देण्यासाठी जिल्हा प्रशासनाच्या वतीने आवश्यक ते सहकार्य करण्यात येईल, असे जिल्हा नियोजन अधिकारी विक्रम देशमुख यांनी सांगितले.

सांगरुळमध्ये कोल्हापुरी चप्पल निर्मिती युनिटचे उद्घाटन

महिला आर्थिक विकास महामंडळ (माविम) कोल्हापूर अंतर्गत अस्मिता साधन केंद्र, बालिंगा, जिल्हा नियोजन समिती कोल्हापूर आणि नवतेजस्विनी महाराष्ट्र ग्रामीण महिला उद्यम विकास प्रकल्प यांच्या माध्यमातून हे युनिट उभारण्यात आले आहे. जिओ टॅग मानांकन असलेल्या कारागिरांकडून या ठिकाणी कोल्हापुरी चप्पल निर्मिती केली जाणार आहे.

या युनिटचे उद्घाटन जिल्हा नियोजन अधिकारी विक्रम देशमुख यांच्या हस्ते फीत कापून करण्यात आले. यावेळी सांगरुळच्या सरपंच शितल बदाम खाडे, माविमचे पुणे विभागीय व्यवसाय विकास सल्लागार सिद्धराम माशाळे, पुणे विभागीय सल्लागार विलास बच्चे, माविम कोल्हापूरचे वरिष्ठ जिल्हा समन्वय अधिकारी कुंदन शिनगारे, सहायक संचालक (माहिती) वृषाली पाटील, कुंभी कासारी कारखान्याचे उपाध्यक्ष राहुल खाडे, अस्मिता लोकसंचालित साधन केंद्र बालिंगाच्या अध्यक्षा सारिका चौगले, व्यवस्थापक विद्या गुरव, प्रकल्प सल्लागार अनुराग कोकितकर, प्रकल्प व्यवस्थापक सौरभ पोवार यांच्यासह अन्य मान्यवर उपस्थित होते.

यावेळी उत्कृष्ट काम करणाऱ्या बचत गटातील महिलांचा सन्मानही करण्यात आला.

पालकमंत्र्यांच्या पुढाकाराने 1 कोटी 29 लाखांचा प्रकल्प

कोल्हापूरची पारंपरिक ओळख असलेल्या कोल्हापुरी चप्पलला आधुनिक बाजारपेठ मिळवून देण्याबरोबरच ग्रामीण भागातील महिलांना रोजगार व आर्थिकदृष्ट्या सक्षम करण्याच्या उद्देशाने या प्रकल्पाची उभारणी करण्यात आली आहे.

जिल्ह्याचे पालकमंत्री प्रकाश आबिटकर यांच्या पुढाकाराने या प्रकल्पासाठी जिल्हा नियोजन समितीच्या माध्यमातून 80 लाख 26 हजार रुपये अर्थसहाय्य करण्यात आले आहे. तसेच सीएमआरसीच्या माध्यमातून 23 लाख 77 हजार रुपये अर्थसहाय्य, तर नवतेजस्विनी गटाकडून 25 लाख रुपयांचे कर्ज उपलब्ध करून देण्यात आले आहे.

या सर्व माध्यमांतून एकूण 1 कोटी 29 लाख रुपये खर्च करून कोल्हापुरी चप्पल निर्मिती युनिट उभारण्यात आले आहे.

जिओ टॅग मानांकन असलेल्या कारागिरांकडून चप्पल निर्मिती

सांगरुळ परिसरातील बचत गटातील महिलांना कोल्हापुरी चप्पल बनविण्याचे शास्त्रशुद्ध प्रशिक्षण देण्यात आले आहे. या प्रशिक्षित महिलांच्या माध्यमातून दर्जेदार कोल्हापुरी चप्पल तयार करण्यात येणार आहेत.

या प्रकल्पात आधुनिक व अद्ययावत मशिनरीचा वापर करण्यात येत असल्यामुळे कमी वेळेत अधिक उत्पादन घेणे शक्य होणार आहे. परिणामी ग्रामीण भागात रोजगाराच्या संधी वाढण्याबरोबरच महिला व त्यांच्या कुटुंबांच्या उत्पन्नातही वाढ होण्यास मदत होणार आहे.

चप्पलसोबत बेल्ट, पाकीट आणि पर्सचीही निर्मिती

या युनिटच्या माध्यमातून केवळ पारंपरिक कोल्हापुरी चप्पलच नव्हे, तर ग्राहकांच्या पसंतीनुसार आधुनिक डिझाईनच्या चप्पल, बेल्ट, पाकीट, पर्स यांसारख्या चामडी वस्तूंची निर्मिती करण्यात येणार आहे.

या वस्तू विक्री दालनाच्या माध्यमातून वर्षभर ग्राहकांसाठी उपलब्ध करून देण्यात येणार आहेत. त्यामुळे कोल्हापूरच्या पारंपरिक कलाकौशल्याला आधुनिक बाजारपेठेशी जोडण्यास मदत होणार आहे.

ग्रामीण कारागिरांसाठीही प्रकल्पाचा फायदा

घरगुती पातळीवर काम करणाऱ्या ग्रामीण कारागिरांना आवश्यक असलेल्या उपवस्तू या प्रकल्पाच्या माध्यमातून योग्य व वाजवी दरात उपलब्ध करून देण्यात येणार आहेत. त्यामुळे कारागिरांचा श्रम, वेळ आणि खर्च वाचण्यास मदत होणार आहे.

महिलांनी उत्पादित केलेल्या वस्तूंना बाजारपेठ उपलब्ध करून देण्यासाठी स्वतंत्र विक्री केंद्र सुरू करण्यात येत आहे. या माध्यमातून तयार उत्पादनांना थेट ग्राहकांपर्यंत पोहोचविण्याचा प्रयत्न केला जाणार आहे.

सुरुवातीला 50, पुढे 150 महिलांना रोजगाराची संधी

या नाविन्यपूर्ण कोल्हापुरी चप्पल निर्मिती प्रकल्पाच्या माध्यमातून सुरुवातीच्या टप्प्यात 50 महिलांना, तर पुढील काळात 150 महिला व त्यांच्या कुटुंबांना रोजगाराच्या संधी उपलब्ध करून देण्याचे उद्दिष्ट असल्याची माहिती प्रकल्प सल्लागार अनुराग कोकितकर आणि प्रकल्प व्यवस्थापक सौरभ पोवार यांनी दिली.

महिलांनी शासनाच्या योजनांचा लाभ घ्यावा

यावेळी सिद्धराम माशाळे, विलास बच्चे आणि कुंदन शिनगारे यांनी महिला आर्थिक विकास महामंडळाच्या माध्यमातून महिला सक्षमीकरणासाठी राबविण्यात येणाऱ्या विविध योजनांची माहिती दिली.

महिलांच्या कल्याणासाठी केंद्र आणि राज्य शासनाच्या वतीने विविध योजना राबविण्यात येत असून, महिलांनी या योजनांचा लाभ घ्यावा, असे आवाहन करण्यात आले.

सांगरुळ येथील युनिटमधून तयार होणाऱ्या उत्कृष्ट दर्जाच्या कोल्हापुरी चप्पलला व्यापक बाजारपेठ मिळवून देण्यासाठी प्रसिद्धी करण्यात येईल, असे सहायक संचालक (माहिती) वृषाली पाटील यांनी सांगितले.

कुंभी कासारी कारखान्याचे उपाध्यक्ष राहुल खाडे यांनी मनोगत व्यक्त करून या प्रकल्पाला शुभेच्छा दिल्या. कार्यक्रमाला बचत गटातील महिलांसह परिसरातील महिला मोठ्या संख्येने उपस्थित होत्या.

पारंपरिक कलेला आधुनिक बाजारपेठेची जोड

सांगरुळ येथील हा प्रकल्प कोल्हापूरच्या पारंपरिक कोल्हापुरी चप्पल कलेला आधुनिक तंत्रज्ञान, महिला उद्योजकता आणि बाजारपेठेची जोड देणारा महत्त्वपूर्ण उपक्रम ठरण्याची अपेक्षा आहे. महिला बचत गटांच्या माध्यमातून उत्पादन वाढवून त्याला योग्य बाजारपेठ उपलब्ध झाल्यास ग्रामीण महिलांच्या आर्थिक सक्षमीकरणाला मोठी चालना मिळू शकते.