महाराष्ट्र राज्य वर्धापन दिन मुख्य समारंभाची रंगीत तालीम दादरमध्ये पार पडली

मुंबई : महाराष्ट्र राज्य स्थापनेच्या ६७ व्या वर्धापन दिनानिमित्त शुक्रवार, १ मे २०२६ रोजी दादर येथील छत्रपती शिवाजी महाराज मैदानावर मुख्य शासकीय समारंभ आयोजित करण्यात येणार आहे. या कार्यक्रमाची रंगीत तालीम आज उत्साहात पार पडली.

यावेळी राजशिष्टाचार विभागाचे उपसचिव चंद्रकांत मोरे यांच्या हस्ते ध्वजवंदन करण्यात आले. राष्ट्रीय गीत, राष्ट्रगीत आणि राज्यगीताने ध्वजाला सलामी देण्यात आली.

वरिष्ठ अधिकारी उपस्थित

सामान्य प्रशासन विभाग (राजशिष्टाचार) यांच्या वतीने कार्यक्रमाचे आयोजन करण्यात आले होते. यावेळी गृह विभागाचे अपर पोलीस महासंचालक (प्रशासन) मधुकर पांडे यांच्यासह वरिष्ठ अधिकारी उपस्थित होते.

उत्कृष्ट संचलन करणाऱ्या पथकांचा गौरव

२६ जानेवारी २०२६ रोजी झालेल्या प्रजासत्ताक दिन समारंभात उत्कृष्ट संचलन करणाऱ्या पथकांना यावेळी पारितोषिके प्रदान करण्यात आली.

सशस्त्र दल विजेते:

प्रथम: राज्य राखीव पोलीस पथक

द्वितीय: बृहन्मुंबई पोलीस सशस्त्र पुरुष पथक

तृतीय (संयुक्त): बृहन्मुंबई दंगल नियंत्रण पथक, गोंदिया व गडचिरोली जिल्ह्याचे सी-६० पथक

नि:शस्त्र दल विजेते:

प्रथम: मुंबई अग्निशमन दल

द्वितीय: सुरक्षा रक्षक मंडळ बृहन्मुंबई आणि ठाणे जिल्हा

तृतीय: राज्य उत्पादन शुल्क विभाग

शालेय पथकांना पुरस्कार

शालेय पथकांमध्ये:

प्रथम: रुस्तमजी इंटरनॅशनल स्कूल, दहिसर (रोड सेफ्टी पेट्रोल मुली)

द्वितीय: डॉ. अँटोनियो डा सिल्वा हायस्कूल, दादर (रोड सेफ्टी पेट्रोल मुले)

तृतीय: सेंट पॉल हायस्कूल, दादर

स्टुडंट पोलीस कॅडेट कार्यक्रमातील गौरव

२०२५-२६ शैक्षणिक वर्षातील उल्लेखनीय कामगिरी करणाऱ्या शाळांनाही गौरविण्यात आले.

प्रथम: मराठी मुंबई पब्लिक स्कूल, विलेपार्ले (पश्चिम)

द्वितीय: एस.एस.एस मल्टीपर्पज टेक्निकल हायस्कूल, मुंबई

तृतीय: अंजुमन-ए-इस्लाम बद्रुद्दिन तैयबजी हायस्कूल, मुंबई

विविध पथकांची मानवंदना

रंगीत तालीम कार्यक्रमात राज्य राखीव पोलीस दल, बृहन्मुंबई पोलीस, दंगल नियंत्रण पथक, महिला पोलीस दल, वाहतूक पोलीस, गृहरक्षक दल, अग्निशमन दल, पाईप बँड, ब्रास बँड, अश्वदल आणि महिला निर्भया पथकांनी मानवंदना दिली.

राष्ट्रगीताने कार्यक्रमाची सांगता झाली. कार्यक्रमाचे सूत्रसंचालन शिवानी जोशी आणि पल्लवी मुजुमदार यांनी केले.