मुंबई पब्लिक स्कूलमध्ये प्रवेशोत्सव उत्साहात; चिमुकल्यांचे मान्यवरांकडून स्वागत

दिनांक ६ एप्रिल २०२६ रोजी बृहन्मुंबई महानगरपालिकेच्या मुंबई पब्लिक स्कूलमधील केंद्रीय माध्यमिक शिक्षण मंडळ (CBSE) अंतर्गत पूर्व प्राथमिक शाळांमध्ये प्रवेशोत्सव सोहळा मोठ्या उत्साहात पार पडला.

या निमित्ताने मुंबईच्या महापौर Ritu Tawde, शिक्षण समिती अध्यक्षा Rajeshree Shirwadkar, महानगरपालिका आयुक्त Ashwini Bhide तसेच अतिरिक्त आयुक्त (पूर्व उपनगरे) Avinash Dhakane यांनी विविध शाळांना भेट देत चिमुकल्या विद्यार्थ्यांचे स्वागत केले.

राजावाडी (घाटकोपर) येथील शाळेत महापौर रितू तावडे यांनी लेझीम पथकात सहभागी होत विद्यार्थ्यांचे स्वागत केले व त्यांच्याशी संवाद साधला. विक्रोळी येथील हरियाली व्हिलेज शाळेत राजेश्री शिरवडकर यांनी विद्यार्थ्यांना भेटवस्तू देऊन उत्साह वाढवला. दादर (पश्चिम) येथील भवानी शंकर मार्ग शाळेत आयुक्त आश्विनी भिडे यांनी गुलाबपुष्प, पेन्सिल व चॉकलेट देत विद्यार्थ्यांचे स्वागत केले, तसेच त्यांच्या शैक्षणिक प्रगतीचा आढावा घेतला. गोवंडी येथील नटवर पारेख शाळेत डॉ. अविनाश ढाकणे यांनी भेट दिली.

या कार्यक्रमांना उपआयुक्त (शिक्षण) डॉ. प्राची जांभेकर, उपशिक्षणाधिकारी ममता राव, तसेच इतर अधिकारी, शिक्षक व पालक मोठ्या संख्येने उपस्थित होते.

महानगरपालिकेच्या शिक्षण विभागामार्फत ‘मिशन ॲडमिशन’, ‘मिशन मेरिट’ आणि ‘गणित गुरुवार’ यांसारखे उपक्रम राबवले जात असून, विद्यार्थ्यांमध्ये गणित व विज्ञान विषयांबद्दल आवड निर्माण करण्यासाठी खान अकादमीसोबत करार करण्यात आला आहे.

दरम्यान, विद्यार्थ्यांनी संगणकीय प्रयोगशाळेत आकाशगंगा, कोडिंग व कृत्रिम बुद्धिमत्ता यांसारख्या विषयांवर माहिती सादर केली, ज्याचे आयुक्तांनी कौतुक केले.

मुंबईतील CBSE शाळांमध्ये हजारो विद्यार्थी शिक्षण घेत असून, या प्रवेशोत्सवामुळे नव्या शैक्षणिक वर्षाची उत्साहपूर्ण सुरुवात झाली आहे.