नाशिकमध्ये भोंदू अशोक खरात प्रकरण आणि आयटी सेक्स स्कँडलमध्ये धक्कादायक खुलासे; ईडी तपास वेगात

नाशिक (प्रतिनिधी): नाशिक शहरात गाजत असलेल्या भोंदू अशोक खरात प्रकरण आणि आयटी कंपनीतील सेक्स स्कँडलमध्ये दररोज नवे धक्कादायक खुलासे समोर येत आहेत. अधिकृत सूत्रांकडून मिळालेल्या माहितीनुसार, Enforcement Directorate (ईडी) कडून अशोक खरातच्या मागील १० वर्षांतील आर्थिक व्यवहारांची सखोल चौकशी सुरू आहे.

तपासादरम्यान त्याच्या चार बँक खात्यांमधून कोट्यवधी रुपयांचे संशयास्पद व बोगस व्यवहार झाल्याचे उघडकीस आले आहे. सध्या पोलीस कोठडीत असलेल्या अशोक खरातची प्रकृती अचानक बिघडल्याने त्याला तातडीने वैद्यकीय उपचार देण्यात आले. मळमळ, डोकेदुखी आणि श्वास घेण्यास त्रास होत असल्याने कार्डियाक ॲम्बुलन्सद्वारे उपचार करण्यात आले.

या प्रकरणात अशोक खरातला मदत केल्याच्या संशयावरून शहरातील एका नामांकित हॉटेल व्यावसायिकाचीही चौकशी करण्यात आली. मात्र चौकशीनंतर त्याला सोडून देण्यात आले.

दरम्यान, अशोक खरातची फरार पत्नी कल्पना खरात हिने अटकपूर्व जामिनासाठी अर्ज दाखल केला असून राहता न्यायालय येथे सुनावणी सुरू आहे. यापूर्वी १० आणि १६ एप्रिल रोजी सुनावणी झाली होती. आपल्या अर्जात तिने हार्डवेअर दुकानाव्यतिरिक्त इतर कोणत्याही व्यवहाराशी संबंध नसल्याचे सांगितले आहे. तसेच बँक खात्यांचे व्यवहार तिचा पतीच करत असल्याचा दावा तिने केला आहे.

या प्रकरणात शिर्डी पोलीस ठाण्यात तिच्याविरुद्ध गुन्हा दाखल असून, न्यायालयाने आदेश दिल्यास दररोज पोलीस ठाण्यात हजेरी लावण्याची तयारीही तिने दर्शवली आहे.

दरम्यान, नाशिकमधील आयटी कंपनीतील सेक्स स्कँडलमध्येही धक्कादायक बाबी समोर आल्या आहेत. एका पीडित महिलेने दिलेल्या जबाबानुसार, आरोपींकडून सतत अश्लील टिप्पण्या, वैयक्तिक आयुष्यावर टिप्पणी आणि मानसिक छळ केला जात होता. तसेच कंपनीतील व्हॉट्सअ‍ॅप ग्रुपद्वारे आणि इतर तांत्रिक माध्यमांतूनही महिलांचा छळ होत असल्याचे समोर आले आहे.

कंपनीतील वाय-फाय पासवर्डही दररोज बदलून अश्लील शब्दांमध्ये ठेवला जात असल्याची माहिती तपासात उघड झाली आहे. या प्रकरणातील दोन महिला आरोपी अद्याप फरार असून, त्यामध्ये आयटी कंपनीची अधिकारी निदा खान हिचाही समावेश आहे. तिच्या अटकेसाठी पोलीस प्रयत्न करत आहेत.

पोलिसांनी या प्रकरणासाठी विशेष हेल्पलाईन सुरू केली असून, आतापर्यंत २० पेक्षा अधिक तक्रारी प्राप्त झाल्या आहेत. काही आरोपींनी अटकपूर्व जामिनासाठी अर्ज दाखल केले असून, विशेषतः निदा खानच्या अर्जावर २७ एप्रिल रोजी सुनावणी होणार आहे.