रुकडीतील गणेशोत्सव मंडळाच्या प्रांगणात ‘लोकसंवाद-2026’; युवकांना क्रीडा योजनांची माहिती

प्रतिनिधी : उमेश जाधव 

रुकडी : गणेशोत्सवाच्या माध्यमातून शासनाच्या विविध योजना नागरिकांपर्यंत पोहोचविण्याच्या उद्देशाने रुकडी येथील साई युवक मंच सार्वजनिक गणेशोत्सव मंडळाच्या प्रांगणात ‘लोकसंवाद-2026’ उपक्रमाचे आयोजन करण्यात आले. माहिती व जनसंपर्क महासंचालनालयाच्या जिल्हा माहिती कार्यालय, कोल्हापूर आणि जिल्हा प्रशासनाच्या संयुक्त विद्यमाने हा कार्यक्रम आयोजित करण्यात आला.

युवकांना क्रीडा योजनांची माहिती

कार्यक्रमादरम्यान उपस्थित युवक-युवतींना क्रीडा संचालनालयामार्फत खेळाडूंसाठी राबविण्यात येणाऱ्या विविध योजनांची माहिती देण्यात आली. क्रीडा व युवक सेवा, कोल्हापूर विभागाचे उपसंचालक सुहास पाटील यांनी क्रीडा क्षेत्रातील उपलब्ध शासकीय योजना आणि संधींबाबत मार्गदर्शन केले.

यावेळी सुहास पाटील यांनी युवकांनी व्यायामाची आवड जोपासण्याचे आवाहन केले. तसेच खेळाडूंनी डोपिंगपासून दूर राहून प्रामाणिकपणे क्रीडा क्षेत्रात प्रगती करण्यावर भर द्यावा, असे त्यांनी सांगितले.

कोल्हापूरची क्रीडा परंपरा

कोल्हापूरमध्ये छत्रपती शाहू महाराजांच्या काळापासून क्रीडा संस्कृतीला प्रोत्साहन मिळाले आहे. या जिल्ह्याने देशाला अनेक नामवंत खेळाडू दिले असल्याचे सुहास पाटील यांनी नमूद केले.

राज्य शासनाकडून खेळाडूंना प्रोत्साहन देण्यासाठी विविध उपाययोजना करण्यात येतात. शासकीय नोकरीमध्ये खेळाडूंसाठी ५ टक्के जागा राखीव ठेवण्यात येत असल्याची माहिती यावेळी देण्यात आली.

ऑलिंपिक पदक विजेत्यांसाठी रोख पारितोषिक

राज्य शासनाकडून ऑलिंपिक पदक विजेत्या खेळाडूंना देण्यात येणाऱ्या पारितोषिकांची माहितीही यावेळी देण्यात आली. सुवर्णपदक विजेत्या खेळाडूला ५ कोटी रुपये, रौप्यपदक विजेत्याला ३ कोटी रुपये, तर कांस्यपदक विजेत्याला २ कोटी रुपये बक्षीस देण्यात येते, अशी माहिती सुहास पाटील यांनी दिली.

‘खेलो इंडिया’ आणि ‘मिशन लक्षवेध’सह विविध योजना

विद्यार्थी आणि युवकांना क्रीडा क्षेत्रात प्रोत्साहन देण्यासाठी क्रीडा विभागामार्फत शालेय व जिल्हा प्रशिक्षण, ‘खेलो इंडिया’ तसेच ‘मिशन लक्षवेध’ यांसारख्या विविध योजना राबविण्यात येत असल्याचे सांगण्यात आले.

कोणत्याही खेळात प्रावीण्य मिळविण्यासाठी सातत्य महत्त्वाचे आहे. खेळाडूंनी नियमित सरावाला प्राधान्य देऊन आपल्या खेळातील कौशल्य विकसित करावे, असे आवाहन सुहास पाटील यांनी केले.

नागरिकांच्या प्रश्नांचे निरसन

‘लोकसंवाद-2026’च्या माध्यमातून नागरिकांशी थेट संवाद साधण्यात आला. शासनाच्या विविध योजनांबाबत नागरिकांनी विचारलेल्या प्रश्नांचे निरसन करून संबंधित योजनांची माहिती देण्यात आली.

या कार्यक्रमाला माजी जिल्हा परिषद सदस्य बबलू मकानदार, साई युवक मंच सार्वजनिक गणेशोत्सव मंडळाचे अध्यक्ष विशाल जाधव, उपाध्यक्ष पप्पू जमादार, बापू पवार, दामू दाते, पियुष देसले यांच्यासह क्रीडाप्रेमी नागरिक मोठ्या संख्येने उपस्थित होते.

गणेशोत्सवाच्या माध्यमातून शासनाच्या योजना, क्रीडा क्षेत्रातील संधी आणि युवकांसाठीच्या विविध उपक्रमांची माहिती थेट नागरिकांपर्यंत पोहोचविण्यासाठी ‘लोकसंवाद-2026’ उपक्रम महत्त्वपूर्ण ठरत आहे.