श्रीराम जन्मभूमी मंदिरातील कथित गैरव्यवहार प्रकरणी निष्पक्ष चौकशीची मागणी; पंतप्रधानांसह चारही प्राधिकरणांना संगीता तिवारी यांचे निवेदन

नाशिक ब्यूरो 

पुणे : पायल तिवारी बिटिया फाउंडेशनच्या अध्यक्षा संगीता तिवारी यांनी अयोध्येतील श्रीराम जन्मभूमी मंदिरातील देणग्या, दागिने आणि इतर मौल्यवान संपत्तीबाबत प्रसारमाध्यमांमध्ये प्रसिद्ध झालेल्या कथित गैरव्यवहाराच्या आरोपांची स्वतंत्र आणि निष्पक्ष चौकशी करण्याची मागणी केली आहे.

यासंदर्भात त्यांनी पंतप्रधान नरेंद्र मोदी, उत्तर प्रदेशचे मुख्यमंत्री, उत्तर प्रदेशचे पोलीस महासंचालक तसेच महाराष्ट्राचे मुख्यमंत्री यांना निवेदन पाठविले आहे.

निवेदनात श्रीराम जन्मभूमी मंदिर हे कोट्यवधी हिंदूंच्या श्रद्धेचे केंद्र असल्याचे नमूद करत, मंदिरातील देणग्या, सोने-चांदी, दागिने आणि इतर मौल्यवान वस्तूंशी संबंधित कथित गैरव्यवहाराच्या आरोपांचे सत्य निष्पक्ष चौकशीतून समोर यावे, अशी मागणी करण्यात आली आहे.

तसेच या प्रकरणाची विशेष तपास पथक (SIT) किंवा अन्य सक्षम स्वतंत्र यंत्रणेमार्फत चौकशी, देणग्या आणि आर्थिक व्यवहारांचे फॉरेन्सिक व विशेष आर्थिक लेखापरीक्षण (Forensic Audit आणि Special Financial Audit), सीसीटीव्ही नोंदी, स्टॉक रजिस्टर, दान नोंदी आणि बँक व्यवहारांची तपासणी तसेच चौकशीत दोषी आढळणाऱ्यांवर कायद्यानुसार कठोर कारवाई करण्याची मागणी करण्यात आली आहे.

निवेदनात चौकशीचा अंतिम अहवाल सार्वजनिक करावा आणि भविष्यात मंदिरातील देणगी व्यवस्थापन अधिक पारदर्शक, डिजिटल व नियमित स्वतंत्र लेखापरीक्षणाच्या अधीन करावे, अशीही मागणी करण्यात आली आहे.

संगीता तिवारी यांनी या प्रकरणाचा संबंध केवळ आर्थिक बाबींशी नसून कोट्यवधी रामभक्तांच्या श्रद्धा आणि विश्वासाशी असल्याचे नमूद करत, निष्पक्ष आणि वेळबद्ध चौकशीची अपेक्षा व्यक्त केली आहे.

टीप: या निवेदनातील आरोप आणि मागण्या या निवेदनकर्त्यांच्या भूमिकेनुसार आहेत. संबंधित प्रकरणातील अधिकृत चौकशी किंवा न्यायालयीन प्रक्रियेचा अंतिम निष्कर्ष अद्याप जाहीर झालेला नाही.