शाळा प्रवेशोत्सवानिमित्त नूतन माध्यमिक विद्यालयात आकर्षक फलक रेखाटन; विद्यार्थ्यांच्या स्वागताची जय्यत तयारी

नाशिक ब्यूरो 

नाशिक, दि. १४ जून : उन्हाळी सुट्टीनंतर सोमवार, दि. १५ जून २०२६ पासून राज्यभर नवीन शैक्षणिक वर्षाला सुरुवात होत आहे. शाळेचा पहिला दिवस जवळ आल्याने विद्यार्थ्यांमध्ये उत्साहाचे वातावरण निर्माण झाले असून नवीन दप्तर, पुस्तके, वह्या तसेच मित्र-मैत्रिणी आणि शिक्षकांना भेटण्याची उत्सुकता विद्यार्थ्यांमध्ये दिसून येत आहे.

शाळेच्या पहिल्या दिवशी विद्यार्थ्यांचे उत्साहपूर्ण स्वागत करण्यासाठी विविध शाळांकडून विशेष तयारी करण्यात आली आहे. त्याच पार्श्वभूमीवर नूतन माध्यमिक विद्यालय, भाटगाव (ता. चांदवड, जि. नाशिक) येथे शाळा प्रवेशोत्सवानिमित्त आकर्षक फलक रेखाटन करण्यात आले आहे.

शाळेचे कलाशिक्षक देव हिरे यांनी शाळेच्या दर्शनी फलकावर रंगीत खडूंच्या साहाय्याने सुंदर आणि आकर्षक कलाकृती साकारली आहे. या फलकामधून विद्यार्थ्यांचे स्वागत करण्यात येणार असून नवीन शैक्षणिक वर्षाचा आनंद आणि उत्साह प्रभावीपणे व्यक्त करण्यात आला आहे.

शाळा प्रवेशोत्सव हा विद्यार्थ्यांना आनंददायी वातावरणात शाळेत स्वागत करण्याचा महत्त्वपूर्ण उपक्रम मानला जातो. यामुळे विद्यार्थ्यांमध्ये शाळेविषयी आपुलकी निर्माण होण्यास मदत होते. विशेषतः नव्याने प्रवेश घेणाऱ्या विद्यार्थ्यांसाठी हा दिवस संस्मरणीय ठरावा यासाठी शाळा प्रशासन आणि शिक्षकांकडून विविध उपक्रमांचे आयोजन करण्यात येत आहे.

नूतन माध्यमिक विद्यालयातील या आकर्षक फलक रेखाटनाचे परिसरातील नागरिक, पालक आणि विद्यार्थ्यांकडून कौतुक केले जात असून, नवीन शैक्षणिक वर्षाच्या स्वागतासाठी शाळेने केलेली ही कलात्मक तयारी सर्वांचे लक्ष वेधून घेत आहे.