शिवराज्याभिषेक दिनानिमित्त कलाशिक्षक देव हिरे यांची खडू-फळा रेखाटनातून छत्रपती शिवरायांना मानवंदना

नाशिक प्रतिनिधी: शुभांगी शिंदे

नाशिक, दि. ६ जून २०२६ : शिवराज्याभिषेक दिनानिमित्त नाशिक जिल्ह्यातील चांदवड तालुक्यातील भाटगाव येथील नूतन माध्यमिक विद्यालयाचे कलाशिक्षक देव हिरे यांनी रंगीत खडू आणि फळा माध्यमातून आकर्षक फलक रेखाटन साकारत छत्रपती शिवाजी महाराजांना अनोखी मानवंदना अर्पण केली.

छत्रपती शिवाजी महाराजांचा राज्याभिषेक हा भारतीय इतिहासातील स्वाभिमान, स्वातंत्र्य आणि राष्ट्रनिर्मितीचा सुवर्णक्षण मानला जातो. ६ जून १६७४ रोजी रायगड किल्ल्यावर महाराजांचा राज्याभिषेक झाला आणि त्यानंतर ‘राज्याभिषेक शक’ या नव्या कालगणनेची सुरुवात झाली. याच दिवशी महाराजांनी ‘छत्रपती’ ही सार्वभौम पदवी धारण करून स्वतंत्र आणि सार्वभौम स्वराज्याची स्थापना केली.

रयतेचे कल्याण, सर्वधर्मसमभाव, न्याय आणि लोकाभिमुख प्रशासन या मूल्यांवर आधारित स्वराज्याची संकल्पना प्रत्यक्षात आणणाऱ्या जाणत्या राजाला अभिवादन करण्यासाठी देव हिरे यांनी शाळेच्या फळ्यावर रंगीत खडूंच्या साहाय्याने प्रभावी कलाकृती साकारली. या रेखाटनातून शिवरायांच्या कार्याचा आणि राज्याभिषेक दिनाच्या ऐतिहासिक महत्त्वाचा संदेश विद्यार्थ्यांपर्यंत पोहोचविण्यात आला.

शालेय स्तरावर इतिहास, कला आणि राष्ट्रप्रेम यांचा सुंदर संगम घडवून आणणारा हा उपक्रम विद्यार्थ्यांसाठी प्रेरणादायी ठरला. उपस्थित शिक्षक व विद्यार्थ्यांनी या कलाकृतीचे कौतुक करत शिवराज्याभिषेक दिन उत्साहात साजरा केला.