श्री सिद्धिविनायक मंदिर परिसर सुशोभीकरणामुळे परिसराला मिळणार नवे रूप; मुख्यमंत्र्यांच्या हस्ते भूमिपूजन

मुंबई, दि. २५ : मुंबईतील प्रसिद्ध श्री सिद्धिविनायक मंदिर परिसराच्या सुशोभीकरण प्रकल्पाला सुरुवात झाली असून या प्रकल्पामुळे मंदिर परिसराला आधुनिक आणि आकर्षक स्वरूप प्राप्त होणार असल्याचा विश्वास मुख्यमंत्री देवेंद्र फडणवीस यांनी व्यक्त केला.

श्री सिद्धिविनायक मंदिर परिसर सुशोभीकरण प्रकल्पाच्या पहिल्या टप्प्यातील कामांचे भूमिपूजन मुख्यमंत्री देवेंद्र फडणवीस यांच्या हस्ते पार पडले. यानंतर प्रसारमाध्यमांशी संवाद साधताना त्यांनी मंदिर परिसर विकासासंदर्भातील महत्त्वाची माहिती दिली.

मुख्यमंत्री म्हणाले की, श्री सिद्धिविनायक मंदिरात देश-विदेशातून मोठ्या संख्येने भाविक दर्शनासाठी येत असतात. वाढत्या भाविक संख्येच्या पार्श्वभूमीवर दर्शन व्यवस्था अधिक सुलभ करणे तसेच कमी वेळेत दर्शन सुविधा उपलब्ध करून देणे आवश्यक आहे.

मंदिर परिसरात विविध पायाभूत सुविधांची कामे सुरू असून त्याचाच एक भाग म्हणून सुशोभीकरण प्रकल्प हाती घेण्यात आला आहे. हा प्रकल्प पूर्ण झाल्यानंतर मंदिर परिसर अधिक सुबक, सुविधायुक्त आणि भाविकांसाठी अनुकूल होणार असल्याचे मुख्यमंत्री देवेंद्र फडणवीस यांनी सांगितले.

या प्रकल्पामुळे दररोज दर्शनासाठी येणाऱ्या भाविकांना अधिक चांगल्या सुविधा, स्वच्छ आणि प्रसन्न वातावरण उपलब्ध होणार असून परिसरातील एकूण व्यवस्थापन अधिक सक्षम होण्यास मदत होणार आहे.

या कार्यक्रमाला उपमुख्यमंत्री एकनाथ शिंदे, श्री सिद्धिविनायक गणपती मंदिर न्यासाचे अध्यक्ष सदानंद शंकर सरवणकर, आमदार कालिदास कोळंबकर, आमदार प्रसाद लाड, मुंबई महापौर रितू तावडे, उपमहापौर संजय घाडी तसेच सिद्धिविनायक मंदिर न्यासाचे पदाधिकारी आणि विश्वस्त उपस्थित होते.

मंदिर परिसराच्या नियोजित विकासामुळे धार्मिक पर्यटनालाही चालना मिळण्याची अपेक्षा व्यक्त केली जात आहे. भाविकांना अधिक सुरक्षित, सुटसुटीत आणि आधुनिक सुविधा उपलब्ध करून देण्याच्या दृष्टीने हा प्रकल्प महत्त्वाचा मानला जात आहे.