वाकोला परिसरातील पदपथांवरील ३७ अनधिकृत दुकानांवर निष्कासनाची कारवाई; ‘पादचारी प्रथम’ अभियानांतर्गत महापालिकेचा दणका

प्रतिनिधी : नरेश शिंदे 

मुंबई, दि. १२ ऑगस्ट २०२६ : मुंबईतील पदपथ पादचाऱ्यांसाठी अडथळामुक्त आणि सुरक्षित करण्याच्या उद्देशाने बृहन्मुंबई महानगरपालिकेकडून राबविण्यात येत असलेल्या ‘पादचारी प्रथम’ (Pedestrian First) अभियानाला वेग आला आहे. या अभियानांतर्गत वाकोला परिसरातील राजेंद्र कांबळे मार्गालगतच्या पदपथावर अडथळा निर्माण करणाऱ्या ३७ अनधिकृत दुकानांवर निष्कासनाची कारवाई करण्यात आली.

बृहन्मुंबई महानगरपालिकेच्या ‘एच पूर्व’ विभागाकडून ११ ऑगस्ट २०२६ रोजी ही कारवाई करण्यात आली. कारवाईदरम्यान पदपथांवर उभारण्यात आलेली अनधिकृत दुकाने हटविण्यात आली, तसेच पादचाऱ्यांच्या मार्गात अडथळा ठरणारे विविध साहित्य जप्त करण्यात आले.

उच्च न्यायालयाच्या निर्देशांनुसार कारवाई

माननीय उच्च न्यायालयाच्या निर्देशांनुसार, महानगरपालिका आयुक्त श्रीमती अश्विनी भिडे यांच्या मार्गदर्शनाखाली मुंबईतील पदपथांवरील अनधिकृत फेरीवाले आणि अतिक्रमणे हटविण्यासाठी ‘पादचारी प्रथम’ अभियान प्रभावीपणे राबविण्यात येत आहे.

या अभियानाचा मुख्य उद्देश मुंबईतील पदपथ पादचाऱ्यांसाठी मोकळे करून त्यांना सुरक्षित आणि सुलभपणे मार्गक्रमण करता यावे, हा आहे. त्याच पार्श्वभूमीवर वाकोला परिसरात ही विशेष निष्कासन कारवाई करण्यात आली.

३७ अनधिकृत दुकानांवर कारवाई

उपायुक्त (परिमंडळ-३) श्री. विश्वास मोटे यांच्या मार्गदर्शनाखाली आणि सहायक आयुक्त (एच पूर्व विभाग) श्रीमती मृदुला अंडे यांच्या नेतृत्वाखाली ही कारवाई करण्यात आली.

कारवाईदरम्यान राजेंद्र कांबळे मार्गालगतचे पदपथ अतिक्रमणमुक्त करण्यात आले. पदपथांवर उभारण्यात आलेली ३७ अनधिकृत दुकाने निष्कासित करण्यात आली. तसेच पादचाऱ्यांच्या मार्गात अडथळा निर्माण करणारे साहित्यही जप्त करण्यात आले.

३१ अधिकारी-कर्मचारी, जेसीबीसह यंत्रसामग्रीचा वापर

या कारवाईसाठी महापालिकेच्या सुमारे ३१ अधिकारी-कर्मचाऱ्यांचे पथक तैनात करण्यात आले होते. कारवाईसाठी ४ वाहने, २ डंपर, १ जेसीबी आणि अन्य आवश्यक संयंत्रांचा वापर करण्यात आला. कारवाईदरम्यान कोणताही अनुचित प्रकार घडू नये यासाठी पुरेसा पोलिस बंदोबस्तही तैनात करण्यात आला होता.

पदपथांवर अतिक्रमण केल्यास कठोर कारवाई

मुंबईतील पादचाऱ्यांना सुलभ, सुरक्षित आणि अडथळामुक्त पदपथ उपलब्ध करून देण्यासाठी महानगरपालिकेकडून विविध उपाययोजना करण्यात येत आहेत. त्यामुळे नागरिक, दुकानदार आणि व्यावसायिकांनी पदपथांवर अडथळा निर्माण होईल, अशा प्रकारचे अनधिकृत बांधकाम करू नये किंवा कोणतेही साहित्य ठेवू नये, असे आवाहन महापालिका प्रशासनाने केले आहे.

पदपथांवर अतिक्रमण किंवा अनधिकृत बांधकाम करून पादचाऱ्यांच्या मार्गात अडथळा निर्माण केल्याचे निदर्शनास आल्यास संबंधितांविरुद्ध कठोर निष्कासनाची कारवाई करण्यात येईल, असा इशाराही महापालिका प्रशासनाने दिला आहे.

‘पादचारी प्रथम’ अभियानामुळे मुंबईतील प्रमुख रस्ते आणि पदपथ अधिक शिस्तबद्ध करण्याच्या महापालिकेच्या प्रयत्नांना वेग मिळत असून, वाकोला येथील कारवाई ही त्याच अभियानाचा एक भाग आहे.