जागतिक सायकल दिन उत्साहात साजरा; नाशिकमध्ये जनजागृती सायकल राईडला उत्स्फूर्त प्रतिसाद

नाशिक प्रतिनिधी | शुभांगी शिंदे

जागतिक सायकल दिनानिमित्त नाशिकमध्ये उत्साहाचे वातावरण पाहायला मिळाले. नाशिक सायकलिस्ट फाउंडेशनच्या वतीने आयोजित करण्यात आलेल्या जनजागृती सायकल राईडमध्ये मोठ्या संख्येने सायकलप्रेमींनी सहभाग घेतला.

शहरातील अनंत कान्हेरे मैदान येथून या सायकल राईडला सुरुवात करण्यात आली. शहरातील प्रमुख मार्गांवरून मार्गक्रमण करत ही राईड तपोवन ग्राउंड येथे संपन्न झाली.

आरोग्य आणि पर्यावरण संरक्षणाचा संदेश

जागतिक सायकल दिनाचे औचित्य साधत या उपक्रमातून सायकलिंगचे महत्त्व अधोरेखित करण्यात आले. नियमित सायकलिंगमुळे आरोग्य संवर्धन, पर्यावरण संरक्षण तसेच शाश्वत जीवनशैलीचा अवलंब करण्याचा संदेश सहभागी नागरिकांना देण्यात आला.

नाशिक–पंढरपूर सायकल वारीचे जनजागरण

यावेळी येत्या १०, ११ आणि १२ जुलै रोजी आयोजित करण्यात येणाऱ्या नाशिक–पंढरपूर सायकल वारीबाबतही जनजागृती करण्यात आली. या वारीमध्ये अधिकाधिक सायकलप्रेमींनी सहभागी व्हावे, असे आवाहन आयोजकांनी केले.

विठ्ठल नामाच्या जयघोषाने दुमदुमले तपोवन ग्राउंड

राईडच्या समारोपानंतर तपोवन ग्राउंड येथे सायकलिस्टांनी आकर्षक सायकल रिंगण साकारले. विठ्ठल नामाच्या जयघोषात आणि भक्तिमय वातावरणात हा विशेष सोहळा पार पडला. उपस्थित सायकलिस्टांनी या अनोख्या रिंगणाचा मनमुराद आनंद लुटला.

पदाधिकाऱ्यांची उपस्थिती

या उपक्रमात नाशिक सायकलिस्ट फाउंडेशनचे अध्यक्ष अमित घुगे, उपाध्यक्ष दविंदर सिंग भेला तसेच संचालक माधुरी गडाख, अश्विनी कोंडेकर, सीमा घुगे आणि शुभम भालेराव यांची प्रमुख उपस्थिती होती.

सायकलिंगचा प्रसार, पर्यावरण संवर्धन आणि निरोगी जीवनशैलीचा संदेश देणारा हा उपक्रम नाशिककरांच्या उत्स्फूर्त प्रतिसादामुळे यशस्वी ठरला.