जागतिक पर्यावरण दिनानिमित्त येरवडा कारागृह परिसरात ११ हजार वृक्षांची लागवड; घनदाट नागरी वन निर्मितीला प्रारंभ

पर्यावरण | पुणे | सामाजिक उपक्रम

मनिषा गुरव | चीफ एडिटर

पुणे : जागतिक पर्यावरण दिनाचे औचित्य साधून रोटरी क्लब ऑफ पुणे टिळक रोडच्या वतीने येरवडा खुले कारागृह परिसरात ११ हजार वृक्षांची लागवड करून घनदाट नागरी वन (Dense Urban Forest) निर्माण करण्याच्या महत्त्वाकांक्षी उपक्रमाचा शुभारंभ करण्यात आला. वाढते शहरीकरण, प्रदूषण आणि हवामान बदलाच्या आव्हानांना तोंड देण्यासाठी हा उपक्रम महत्त्वपूर्ण ठरणार असल्याचे यावेळी सांगण्यात आले.

या उपक्रमाच्या उद्घाटन प्रसंगी डॉ. सुहास वारके, नंदकिशोर नाईक, संतोष मराठे, देवदत्त हंबर्डीकर, शामकांत शेडगे तसेच राजेंद्रकुमार सराफ यांच्यासह विविध मान्यवर उपस्थित होते.

येरवडा खुले कारागृह परिसरातील सुमारे एक एकर जागेवर हा प्रकल्प राबविण्यात येत असून, त्याद्वारे शहरातील हरितक्षेत्र वाढविण्यासोबत पर्यावरण संवर्धनालाही चालना मिळणार आहे. या घनदाट नागरी वनामुळे जैवविविधतेचे संरक्षण, हवेच्या गुणवत्तेत सुधारणा, कार्बन शोषण क्षमता वाढ आणि पर्यावरणीय संतुलन राखण्यास मदत होणार आहे.

पर्यावरण संरक्षणासाठी सामूहिक प्रयत्नांची गरज

यावेळी उपस्थित मान्यवरांनी पर्यावरण संरक्षण ही काळाची गरज असल्याचे अधोरेखित केले. शहरांमध्ये निर्माण होणारी घनदाट नागरी जंगले ही शहरांची ‘फुफ्फुसे’ असल्याचे सांगत अशा उपक्रमांमुळे भविष्यातील पिढ्यांसाठी निरोगी पर्यावरण निर्माण होण्यास मदत होईल, असे मत व्यक्त करण्यात आले.

विशेष म्हणजे, या उपक्रमाचा उद्देश केवळ वृक्षारोपणापुरता मर्यादित नसून लागवड केलेल्या प्रत्येक वृक्षाचे संगोपन आणि संवर्धन करण्याची जबाबदारी कारागृह प्रशासनाने स्वीकारली आहे. त्यामुळे हा परिसर भविष्यात समृद्ध हरित पट्टा म्हणून विकसित होणार आहे.

रोटरी क्लबच्या पर्यावरण संवर्धन विषयक सातत्यपूर्ण उपक्रमांमध्ये या प्रकल्पाची महत्त्वपूर्ण भर पडणार असून समाजातील विविध घटकांनीही अशा पर्यावरणपूरक मोहिमांमध्ये सक्रिय सहभाग घ्यावा, असे आवाहन यावेळी करण्यात आले.