दिल्ली मराठी चित्रपट महोत्सवाला उत्स्फूर्त प्रतिसाद; दिमाखदार सांगता

प्रतिनिधी: नरेश शिंदे 

नवी दिल्ली, दि. १० ऑगस्ट २०२६ : राजधानी दिल्लीतील रसिकांना मराठी चित्रपटांच्या समृद्ध परंपरेची ओळख करून देणाऱ्या दिल्ली मराठी चित्रपट महोत्सवाची रविवारी उत्स्फूर्त प्रतिसादात दिमाखदार सांगता झाली. दिल्ली मराठी प्रतिष्ठानतर्फे महाराष्ट्र शासनाच्या सहकार्याने डॉ. बाबासाहेब आंबेडकर इंटरनॅशनल सेंटर येथे आयोजित करण्यात आलेल्या तीन दिवसीय महोत्सवाला दिल्लीतील मराठी नागरिकांसह इतर भाषिक रसिकांचाही मोठा प्रतिसाद मिळाला.

महोत्सवादरम्यान विविध दर्जेदार मराठी चित्रपटांचे प्रदर्शन तसेच कलाकार, दिग्दर्शक आणि तंत्रज्ञांसोबत संवादाचे कार्यक्रम आयोजित करण्यात आले. रसिकांनी मोठ्या संख्येने उपस्थित राहत मराठी चित्रपट आणि संस्कृतीबद्दलची आपली आस्था व्यक्त केली.

महोत्सव अधिक व्यापक करण्याचा निर्धार

समारोपप्रसंगी दिल्ली मराठी प्रतिष्ठानचे संस्थापक आणि महोत्सवाचे प्रमुख आयोजक वैभव डांगे यांनी महोत्सवाच्या यशाबद्दल समाधान व्यक्त केले. महोत्सवासाठी उपस्थित राहिलेल्या कलाकार आणि दिग्दर्शकांनी रसिकांशी थेट संवाद साधत चित्रपट निर्मितीमागील अनुभव, विचार आणि भूमिका मांडल्या.

दिल्लीतील मराठी नागरिकांसोबतच इतर भाषिक रसिकांनी दिलेला प्रतिसाद ही महोत्सवाची मोठी जमेची बाजू असल्याचे डांगे यांनी सांगितले. हा केवळ प्रारंभ असून आगामी काळात महोत्सव अधिक व्यापक आणि भव्य स्वरूपात आयोजित करण्याचा निर्धार त्यांनी व्यक्त केला.

विविध दर्जेदार चित्रपटांचे प्रदर्शन

तीन दिवसांच्या महोत्सवात ‘देऊळ बंद २’, ‘सत्यशोधक’, ‘उत्तर’, ‘तुंबाडची मंजुळा’, ‘स्थळ’, ‘घबाडकुंड’, ‘फुलवंती’, ‘सामना’ आणि ‘आशा’ यांसह विविध मराठी चित्रपट प्रदर्शित करण्यात आले.

यासोबतच ‘परत ४१° च्या मागावर’, ‘वॉटरमॅन’ आणि ‘ग्लो वॉर्म इन जंगल’ या लघुपटांनाही रसिकांचा चांगला प्रतिसाद मिळाला. सामाजिक वास्तव, मानवी नातेसंबंध, सांस्कृतिक वारसा आणि बदलत्या समाजजीवनाचे विविध पैलू मांडणाऱ्या या कलाकृतींनी रसिकांना विचार करण्यास प्रवृत्त केले.

कलाकारांशी थेट संवाद ठरला आकर्षण

चित्रपट प्रदर्शनासोबत आयोजित संवाद सत्रे महोत्सवाचे विशेष आकर्षण ठरली. प्रसिद्ध दिग्दर्शक प्रवीण तरडे, ‘सत्यशोधक’चे दिग्दर्शक निलेश जळमकर, ‘तुंबाडची मंजुळा’चे क्रिएटिव्ह प्रोड्युसर गणेश सपट, ‘घबाडकुंड’चे कलाकार संदीप पाठक, ‘मामाच्या गोव्याला जाऊ या’चे कलाकार अभिजित चव्हाण, ‘गांधी टॉक्स’च्या कलाकार उषा नाडकर्णी आणि दिग्दर्शक किशोर बेलेकर यांनी रसिकांशी संवाद साधला.

यावेळी कलाकारांनी चित्रपट निर्मिती, व्यक्तिरेखा, दिग्दर्शन आणि तांत्रिक बाबींवरील अनुभव मांडले. रसिकांनीही कलाकारांना थेट प्रश्न विचारत संवाद साधल्याने या सत्रांना अधिक जिवंत स्वरूप प्राप्त झाले.

‘फिल्म मास्टर क्लास’ला तरुणांचा उत्स्फूर्त प्रतिसाद

महोत्सवातील **‘फिल्म मास्टर क्लास’**लाही विशेष प्रतिसाद मिळाला. फिल्म अँड टेलिव्हिजन इन्स्टिट्यूट ऑफ इंडियाचे प्रा. डॉ. मिलिंद दामले यांच्या मार्गदर्शनाखाली चित्रपट निर्मिती, दिग्दर्शन आणि चित्रपट रसग्रहणाच्या विविध पैलूंवर मार्गदर्शन करण्यात आले.

या उपक्रमात शंभरहून अधिक तरुण-तरुणींनी सहभाग घेतला. नवोदित कलाकार, विद्यार्थी आणि चित्रपट क्षेत्रात करिअर करू इच्छिणाऱ्या युवकांसाठी हा उपक्रम मार्गदर्शक ठरला.

सहभागी विद्यार्थ्यांना ज्येष्ठ सनदी अधिकारी तथा लेखिका सुप्रिया देवस्थळी, दिल्ली मराठी प्रतिष्ठानचे संस्थापक वैभव डांगे, महाराष्ट्र परिचय केंद्राचे संचालक हेमराज बागुल तसेच प्रतिष्ठानचे पदाधिकारी विवेक गार्गे आणि अभिजीत गोडबोले यांच्या हस्ते प्रमाणपत्रांचे वितरण करण्यात आले.

‘दादासाहेब फाळके चित्रपट रसास्वाद मंडळा’ची स्थापना

महोत्सवादरम्यान ‘दादासाहेब फाळके चित्रपट रसास्वाद मंडळा’ची स्थापना करण्यात आली. नवी दिल्लीतील महाराष्ट्र शासनाच्या निवासी आयुक्त तथा सचिव श्वेता सिंघल यांच्या पुढाकाराने आणि महाराष्ट्र परिचय केंद्राच्या सहकार्याने हे मंडळ स्थापन करण्यात आले आहे.

मराठी चित्रपट केवळ मनोरंजनाचे माध्यम नसून ते प्रेक्षकांना विचार करण्यास प्रवृत्त करतात. महाराष्ट्राची समृद्ध सांस्कृतिक परंपरा आणि मराठी भाषेची ओळख दिल्लीतील मराठी तसेच इतर भाषिक नागरिकांना करून देणे हा या उपक्रमाचा मुख्य उद्देश असल्याचे श्वेता सिंघल यांनी स्पष्ट केले.

या मंडळाच्या माध्यमातून दिल्लीमध्ये वर्षभर मराठी चित्रपट प्रदर्शन, चित्रपट रसास्वाद कार्यक्रम, चर्चासत्रे, कलाकार व दिग्दर्शकांशी संवाद आणि कार्यशाळा आयोजित करण्यात येणार आहेत. महाराष्ट्र सदन आणि महाराष्ट्र परिचय केंद्राच्या संयुक्त विद्यमाने दर महिन्याला महाराष्ट्र सदन येथे चित्रपट प्रदर्शन आणि चर्चेचे आयोजन केले जाणार आहे.

पुढील वर्षी ६ ते ८ ऑगस्टदरम्यान महोत्सव

महोत्सवाच्या यशस्वी आयोजनासाठी राज्य शासनाचा सांस्कृतिक कार्य विभाग, फिल्म सिटी तसेच फिल्म अँड टेलिव्हिजन इन्स्टिट्यूट ऑफ इंडियाचे सहकार्य महत्त्वाचे ठरले. यंदाच्या महोत्सवासाठी ३० हून अधिक चित्रपटांच्या प्रवेशिका प्राप्त झाल्या होत्या.

दर्जेदार कलाकृतींची निवड, कलाकारांशी थेट संवाद आणि विविध उपक्रमांमुळे राजधानीतील रसिकांना मराठी चित्रपटविश्वाची व्यापक ओळख झाली.

दरम्यान, समारोपप्रसंगी पुढील वर्षीचा ‘दिल्ली मराठी चित्रपट महोत्सव’ ६ ते ८ ऑगस्ट २०२७ या कालावधीत आयोजित करण्याची घोषणा करण्यात आली. दरवर्षी ऑगस्ट महिन्यात महोत्सव अधिक व्यापक स्वरूपात आयोजित करण्यासोबतच वर्षभर चित्रपट रसास्वादाचे कार्यक्रम घेऊन दिल्लीतील मराठी चित्रपट चळवळीला सातत्यपूर्ण व्यासपीठ उपलब्ध करून देण्याचा संकल्प यावेळी व्यक्त करण्यात आला.