शिवाजी विद्यापीठाच्या कुलगुरुपदी डॉ. राजनीश कामत यांची नियुक्ती; राज्यपाल जिष्णु देव वर्मा यांची घोषणा

मुंबई, दि. २१ मे २०२६ : मुंबई येथील डॉ. होमी भाभा राज्य विद्यापीठाचे विद्यमान कुलगुरू डॉ. राजनीश कामत यांची कोल्हापूर येथील शिवाजी विद्यापीठाच्या कुलगुरुपदी नियुक्ती करण्यात आली आहे. राज्यपाल तथा कुलपती जिष्णु देव वर्मा यांनी त्यांच्या नियुक्तीची अधिकृत घोषणा केली.

डॉ. राजनीश कामत यांची नियुक्ती पाच वर्षांच्या कार्यकाळासाठी किंवा ते वयाची ६५ वर्षे पूर्ण करतील, यापैकी जी तारीख अगोदर असेल त्या कालावधीपर्यंत लागू राहणार आहे.

शिवाजी विद्यापीठाचे माजी कुलगुरू डॉ. दिगंबर शिर्के यांचा कार्यकाळ ७ ऑक्टोबर २०२५ रोजी संपल्यानंतर कुलगुरुपद रिक्त झाले होते. त्यानंतर सावित्रीबाई फुले पुणे विद्यापीठाचे कुलगुरू डॉ. सुरेश गोसावी यांच्याकडे अतिरिक्त कार्यभार सोपविण्यात आला होता.

डॉ. राजनीश कामत यांनी शिवाजी विद्यापीठातून इलेक्ट्रॉनिक्स विषयात एम.एससी. पदवी प्राप्त केली असून गोवा विद्यापीठातून पीएच.डी. पूर्ण केली आहे. अध्यापन, संशोधन आणि प्रशासन क्षेत्रातील त्यांचा प्रदीर्घ अनुभव महत्त्वाचा मानला जातो.

डॉ. कामत यांच्या २११ संशोधन पत्रिका आंतरराष्ट्रीय जर्नल्समध्ये प्रकाशित झाल्या आहेत. याशिवाय त्यांनी १६ पुस्तके प्रकाशित केली असून शैक्षणिक क्षेत्रात त्यांचे उल्लेखनीय योगदान आहे.

शिवाजी विद्यापीठाच्या कुलगुरुपदासाठी निवड प्रक्रिया पार पाडण्यासाठी राज्यपालांनी निवड समिती गठीत केली होती. या समितीचे अध्यक्ष म्हणून कोईम्बतूर येथील भारतीय विद्यापीठाच्या गणित विभागाचे माजी प्राध्यापक व विभागप्रमुख डॉ. पी. कंदास्वामी यांची नियुक्ती करण्यात आली होती.

समितीमध्ये महात्मा गांधी चित्रकूट ग्रामोदय विद्यापीठाचे माजी कुलगुरू प्रा. एन.सी. गौतम हे विद्यापीठ अनुदान आयोगाचे प्रतिनिधी म्हणून सहभागी होते. तसेच इंदोर येथील भारतीय तंत्रज्ञान संस्थेचे संचालक डॉ. सुहास जोशी आणि उच्च व तंत्रशिक्षण विभागाचे अतिरिक्त मुख्य सचिव बी. वेणुगोपाल रेड्डी हे देखील सदस्य होते.

समितीने शिफारस केलेल्या उमेदवारांच्या मुलाखतीनंतर राज्यपालांनी डॉ. राजनीश कामत यांच्या नावावर शिक्कामोर्तब केले