हाफकिन संस्था आणि ‘चक्र’मध्ये सामंजस्य करार; वैद्यकीय संशोधन व क्लिनिकल ट्रायल्सला नवी गती

मुंबई | प्रतिनिधी

महाराष्ट्रातील वैद्यकीय शिक्षण, संशोधन आणि आरोग्यसेवा क्षेत्राला बळकटी देण्यासाठी हाफकिन प्रशिक्षण, संशोधन व चाचणी संस्था आणि महाराष्ट्र शासनाच्या वैद्यकीय शिक्षण व औषधे विभागांतर्गत कार्यरत ‘सेंटर फॉर हेल्थ, अप्लाइड नॉलेज अँड रिसर्च ऑटोनॉमी’ (CHAKR) यांच्यात महत्त्वपूर्ण सामंजस्य करार (MoU) करण्यात आला आहे.

या करारामुळे जैववैद्यकीय संशोधन, क्लिनिकल ट्रायल्स, सार्वजनिक आरोग्य आणि आधुनिक वैद्यकीय तंत्रज्ञानाच्या क्षेत्रात संयुक्त संशोधन आणि सहकार्याचा नवा अध्याय सुरू होणार आहे.

संशोधन आणि प्रशिक्षणाला चालना

सन १८९९ मध्ये स्थापन झालेली हाफकिन संस्था ही देशातील सर्वात जुन्या आणि प्रतिष्ठित जैववैद्यकीय संशोधन संस्थांपैकी एक मानली जाते. संसर्गजन्य रोगांवरील संशोधन, प्रशिक्षण आणि चाचणी क्षेत्रात संस्थेने महत्त्वपूर्ण योगदान दिले आहे.

नव्या सामंजस्य कराराअंतर्गत दोन्ही संस्था पुढील क्षेत्रांमध्ये संयुक्तपणे कार्य करणार आहेत :

प्राध्यापक विकास (Faculty Development)

क्लिनिकल ट्रायल्स

जैववैद्यकीय संशोधन

ट्रान्सलेशनल मेडिसिन

जीनोमिक्स

सार्वजनिक आरोग्य

क्षमता विकास कार्यक्रम

संयुक्त संशोधन प्रकल्पांना प्रोत्साहन

या करारामुळे संयुक्त संशोधन प्रकल्प, प्रशिक्षण कार्यशाळा, प्राध्यापकांची देवाण-घेवाण आणि संशोधनासाठी उपलब्ध पायाभूत सुविधांचा परस्पर वापर यांना प्रोत्साहन मिळणार आहे. तसेच संशोधक आणि विद्यार्थ्यांना अत्याधुनिक संशोधन तंत्रज्ञानाचा लाभ मिळणार आहे.

महाराष्ट्रातील आरोग्य क्षेत्राला लाभ

या सामंजस्य करारामुळे महाराष्ट्रातील वैद्यकीय शिक्षण, आरोग्य संशोधन आणि क्लिनिकल ट्रायल्स क्षेत्रात उत्कृष्टतेला चालना मिळेल. नव्या संशोधन संधी उपलब्ध होऊन आरोग्यसेवा अधिक प्रभावी आणि आधुनिक बनविण्यास मदत होणार आहे. तसेच ज्ञानवृद्धी आणि नवकल्पनांसाठी महत्त्वाचे व्यासपीठ निर्माण होणार आहे.

मान्यवरांची उपस्थिती

कराराच्या वेळी वैद्यकीय शिक्षण व औषधे विभागाचे सचिव धीरज कुमार, CHAKRच्या मुख्य कार्यकारी अधिकारी डॉ. रंजना कुमार, मुख्य प्रशासकीय अधिकारी ब्रिगेडियर मुलगुंद, हाफकिन संस्थेच्या संचालक डॉ. सुवर्णा खरात, मुख्य प्रशासकीय अधिकारी अजित जगताप, सहाय्यक संचालक डॉ. उषा पद्मनाभन, वरिष्ठ वैज्ञानिक अधिकारी डॉ. वृषाली पाटील तसेच प्रशिक्षण विभागाचे प्रमुख उपस्थित होते.

वैद्यकीय संशोधन, नवोन्मेष आणि आरोग्य क्षेत्रातील गुणवत्तावृद्धीसाठी हा करार महत्त्वाचा टप्पा मानला जात आहे.