कोल्हापूर लोकशाही दिनी १७ तक्रार अर्ज दाखल; विहित मुदतीत निपटारा करण्याचे अप्पर जिल्हाधिकाऱ्यांचे निर्देश

प्रतिनिधी: उमेश जाधव 

कोल्हापूर, दि. ३ : जिल्ह्यात प्रत्येक महिन्याच्या पहिल्या सोमवारी आयोजित करण्यात येणारा ‘लोकशाही दिन’ आज अप्पर जिल्हाधिकारी अजय पवार यांच्या उपस्थितीत पार पडला. या लोकशाही दिनात विविध विभागांशी संबंधित एकूण १७ तक्रार अर्ज प्राप्त झाले.

लोकशाही दिनात नागरिकांनी मांडलेल्या तक्रारी आणि समस्यांची गांभीर्याने दखल घेऊन संबंधित अर्जांचा विहित मुदतीत निपटारा करावा, असे निर्देश अप्पर जिल्हाधिकारी अजय पवार यांनी प्रशासकीय यंत्रणेला दिले.

नागरिकांच्या तक्रारींवर तातडीने कार्यवाही करून त्यांना वेळेत न्याय मिळवून देणे ही प्रशासनाची महत्त्वाची जबाबदारी आहे. त्यामुळे प्राप्त झालेल्या प्रत्येक तक्रार अर्जाची योग्य पद्धतीने तपासणी करून संबंधित विभागांनी निश्चित कालावधीत आवश्यक कार्यवाही करावी, अशा सूचना श्री. पवार यांनी सर्व विभागप्रमुखांना दिल्या.

लोकशाही दिन हा नागरिकांना त्यांच्या विविध समस्या आणि तक्रारी थेट प्रशासनासमोर मांडण्यासाठी महत्त्वपूर्ण मंच आहे. या उपक्रमाच्या माध्यमातून नागरिकांच्या प्रश्नांची दखल घेऊन संबंधित विभागांमार्फत त्यावर कार्यवाही केली जाते.

यावेळी निवासी उपजिल्हाधिकारी गजानन गुरव, तहसीलदार तेजस्विनी पाटील यांच्यासह विविध शासकीय विभागांचे प्रमुख उपस्थित होते.