प्रलंबित ॲट्रॉसिटी प्रकरणांचा पाठपुरावा करून विहित मुदतीत कारवाई करा – जिल्हाधिकारी डॉ. विजय राठोड

कोल्हापूर प्रतिनिधी उमेश जाधव 

कोल्हापूर, दि. ३० : अनुसूचित जाती आणि जमाती अत्याचार प्रतिबंधक अधिनियमांतर्गत जिल्ह्यात प्रलंबित असलेल्या प्रकरणांचा नियमित पाठपुरावा करून संबंधितांवर विहित मुदतीत कारवाई करावी. तसेच पीडितांना लवकरात लवकर न्याय मिळू शकेल, यासाठी आवश्यक ती कार्यवाही करावी, असे निर्देश जिल्हाधिकारी डॉ. विजय राठोड यांनी दिले.

जिल्हाधिकारी कार्यालयातील शाहूजी सभागृहात जिल्हा दक्षता व नियंत्रण समितीची बैठक आज आयोजित करण्यात आली होती. या बैठकीत अनुसूचित जाती व जमाती अत्याचार प्रतिबंधक अधिनियमांतर्गत दाखल प्रकरणांचा सविस्तर आढावा घेण्यात आला.

जिल्हाधिकारी डॉ. राठोड म्हणाले की, पोलीस तपासावरील सर्व प्रकरणांचा आवश्यक तपास लवकरात लवकर पूर्ण करण्यात यावा. दोषींविरुद्ध विहित कालावधीत दोषारोपपत्र दाखल करण्याच्या दृष्टीने पोलीस विभागाने प्रभावी कार्यवाही करावी. तसेच तपासाधीन प्रकरणांना गती देऊन पीडितांना न्याय मिळवून देण्यासाठी संबंधित यंत्रणांनी समन्वयाने काम करावे.

कागदपत्रांच्या अभावी प्रलंबित राहिलेल्या प्रकरणांचा तातडीने निपटारा करण्यासाठी विशेष मोहीम राबविण्यात यावी, असे निर्देशही जिल्हाधिकाऱ्यांनी दिले. आवश्यक कागदपत्रांची पूर्तता करून प्रलंबित प्रकरणांवरील कार्यवाहीला गती देण्यावर बैठकीत भर देण्यात आला.

बैठकीत समाज कल्याण आयुक्त सचिन साळे यांनी सद्यस्थितीत पोलीस तपासावर ११ प्रकरणे प्रलंबित असल्याची माहिती दिली. या प्रकरणांचा पाठपुरावा करून तपास प्रक्रिया जलदगतीने पूर्ण करण्याबाबत चर्चा करण्यात आली.

दरम्यान, ॲट्रॉसिटीच्या अनुषंगाने गावोगावी नागरिकांचे प्रबोधन करण्यात यावे, अशी सूचना समितीचे अशासकीय सदस्य संजय कांबळे यांनी केली. अनुसूचित जाती व जमातीतील नागरिकांना त्यांच्या हक्कांबाबत माहिती देणे तसेच अत्याचार प्रतिबंधक कायद्याबाबत व्यापक जनजागृती करणे आवश्यक असल्याचे त्यांनी नमूद केले.

या आढावा बैठकीस होम डिवायएसपी तानाजी सावंत, डॉ. सुनील कुरुंदवाड, सरकारी विधिज्ञ पी. जे. जाधव, पोलीस निरीक्षक नयना पाटील, एलसीबी पथकाचे निवृत्ती माळी यांच्यासह समितीचे इतर अशासकीय सदस्य उपस्थित होते.