लालबागच्या राजाचे आज प्रथम दर्शन; बाप्पाच्या दर्शनासाठी भाविकांची मोठी गर्दी

मुंबई ब्यूरो :  अनिल सावरे 

मुंबई : मुंबईतील लाखो भाविकांचे श्रद्धास्थान आणि नवसाला पावणारा गणपती म्हणून प्रसिद्ध असलेल्या लालबागच्या राजाचे २०२६ मधील प्रथम दर्शन आज झाले. लालबागचा राजा सार्वजनिक गणेशोत्सव मंडळाच्या वतीने आज सायंकाळी ७ वाजता लालबाग मार्केट येथे गणरायाचे प्रथम दर्शन भाविकांसाठी खुले करण्यात आले.

प्रथम दर्शनाची आतुरतेने वाट पाहणाऱ्या भाविकांनी सकाळपासूनच परिसरात गर्दी करण्यास सुरुवात केली होती. दर्शनाचा क्षण जवळ येताच भाविकांमध्ये मोठा उत्साह पाहायला मिळाला. ‘गणपती बाप्पा मोरया’च्या जयघोषाने लालबागचा परिसर दुमदुमून गेला.

यंदा लालबागच्या राजाचा ९३ वा गणेशोत्सव मोठ्या उत्साहात साजरा करण्यात येणार आहे. १४ सप्टेंबर ते २५ सप्टेंबरदरम्यान गणेशोत्सवाचा जल्लोष रंगणार असून देशभरातून तसेच महाराष्ट्राच्या विविध भागांतून मोठ्या संख्येने भाविक मुंबईत दाखल होण्याची अपेक्षा आहे.

प्रथम दर्शनासाठी भाविकांची मोठी गर्दी

‘लालबागचा राजा २०२६’चे प्रथम दर्शन होताच भाविकांनी बाप्पाच्या दर्शनासाठी मोठ्या संख्येने गर्दी केली. अनेक भाविकांनी बाप्पाचे दर्शन घेतल्यानंतर परिसरात छायाचित्रे आणि व्हिडीओ काढत हा अविस्मरणीय क्षण आपल्या मोबाईलमध्ये कैद केला.

लालबागच्या राजाच्या दर्शनासाठी दरवर्षी लाखो भाविक मुंबईत येतात. त्यामुळे गणेशोत्सव काळात गर्दीचे नियोजन, सुरक्षा व्यवस्था आणि भाविकांना सुरळीत दर्शन मिळावे यासाठी मंडळ तसेच प्रशासनाकडून विविध उपाययोजना करण्यात येतात.

यंदाच्या गणेशोत्सवाची सुरुवातच लालबागच्या राजाच्या प्रथम दर्शनाने झाल्याने मुंबईतील गणेशभक्तांमध्ये उत्साहाचे वातावरण निर्माण झाले आहे.