पिंपरी-चिंचवडमध्ये ‘अतिक्रमण मुक्त पदपथ पंधरवडा’; महापालिकेची धडक कारवाई

पुणे प्रतिनिधी रोहन सोनाळे 

पिंपरी चिंचवड :

शहरातील फूटपाथ आणि रस्ते अतिक्रमणमुक्त करण्यासाठी पिंपरी चिंचवड महानगरपालिकेकडून १ ते १५ मे दरम्यान ‘अतिक्रमण मुक्त पदपथ पंधरवडा’ मोहीम राबविण्यात येत आहे. ही मोहीम आयुक्त डॉ. विजय सूर्यवंशी आणि अतिरिक्त आयुक्त तृप्ती सांडभोर यांच्या मार्गदर्शनाखाली सुरू आहे.

अतिक्रमण विभागाचे उप आयुक्त अतुल पाटील आणि संबंधित क्षेत्रीय अधिकाऱ्यांच्या नेतृत्वाखाली शहरातील विविध प्रभागांमध्ये मोठ्या प्रमाणात कारवाई करण्यात येत आहे.

विविध भागांमध्ये कारवाई

फ प्रभाग : RTO रोड, त्रिवेणी नगर ते तळवडे चौक आणि देहू-आळंदी रोड परिसरात टपऱ्या, हातगाड्या व इतर साहित्य जप्त

चिखली (प्रभाग १) : सत्संग रोड ते पिंगळे चौकपर्यंत संपूर्ण रस्ता अतिक्रमणमुक्त

भोसरी परिसर : आळंदी रोड व नाट्यगृह परिसरात मोठ्या प्रमाणात कारवाई

रहाटणी व पिंपळे सौदागर : हातगाड्या, कूलर, फळविक्रेते यांच्यावर कारवाई

या मोहिमेत महापालिका, पोलीस आणि MSF जवानांचा समन्वय ठेवण्यात आला.

मोठ्या प्रमाणात साहित्य जप्त

कारवाईदरम्यान विविध प्रकारचे साहित्य जप्त करण्यात आले, त्यामध्ये:

हातगाड्या, टपऱ्या, कूलर

प्लास्टिक व लोखंडी टेबल-खुर्च्या

स्टँडी बोर्ड, रॅक, छत्र्या

कॅरेट, टायर, पंखे इत्यादी

जप्त केलेले सर्व साहित्य महापालिकेच्या गोडाऊनमध्ये जमा करण्यात आले आहे.

भाजीपाला अन्नछत्रात जमा

कारवाईदरम्यान जप्त करण्यात आलेला भाजीपाला व फळे वाया न घालवता अन्नछत्रात जमा करण्यात आली. यात टमाटर, भेंडी, बटाटा, काकडी, मिरची तसेच आंबे, केळी, नारळ यांचा समावेश आहे.

नागरिकांना आवाहन

महापालिकेकडून नागरिकांना सार्वजनिक रस्ते व फूटपाथ मोकळे ठेवण्याचे आवाहन करण्यात आले आहे. या मोहिमेमुळे वाहतूक व्यवस्था सुधारण्यास आणि पादचाऱ्यांना सुरक्षित मार्ग उपलब्ध होण्यास मदत होत असल्याचे प्रशासनाने सांगितले.

संयुक्त कारवाईचा प्रभाव

या मोहिमेत अतिक्रमण निरीक्षक, बीट अधिकारी, पोलीस कर्मचारी, कंत्राटी मजूर आणि इतर कर्मचारी यांनी एकत्रितपणे काम करून कारवाई यशस्वी केली. शहर अतिक्रमणमुक्त करण्यासाठी ही मोहीम पुढील काळातही सुरू राहणार आहे.