देशव्यापी औषध विक्रेते बंदला पिंपरी-चिंचवडमध्ये १०० टक्के प्रतिसाद; ऑनलाइन औषध विक्रीविरोधात केमिस्ट संघटना आक्रमक

पुणे प्रतिनिधी रोहन सोनाळे 

पिंपरी-चिंचवड : अखिल भारतीय केमिस्ट अँड ड्रगिस्ट असोसिएशन (AIOCD) यांनी पुकारलेल्या देशव्यापी बंदला पिंपरी-चिंचवड शहरातून उत्स्फूर्त आणि १०० टक्के प्रतिसाद मिळाला. शहरातील सर्व होलसेल तसेच रिटेल औषध विक्रेते या आंदोलनात सहभागी झाले होते. संपूर्ण परिसरातील औषध दुकाने बंद ठेवून संघटनेच्या आंदोलनाला भक्कम पाठिंबा देण्यात आला.

हा बंद पूर्णपणे शांततेत, शिस्तबद्ध आणि लोकशाही मार्गाने पार पडला. कोणताही अनुचित प्रकार घडला नसल्याची माहिती संघटनेकडून देण्यात आली. औषध व्यवसायाशी संबंधित गंभीर प्रश्नांकडे शासनाचे लक्ष वेधण्यासाठी हा बंद पुकारण्यात आला होता.

आंदोलनादरम्यान औषध विक्रेता संघटनांनी काही महत्त्वाच्या मागण्या शासनासमोर मांडल्या.

संघटनेच्या म्हणण्यानुसार, बेकायदेशीर आणि अनियंत्रित ऑनलाइन औषध विक्री तात्काळ बंद करण्यात यावी. औषध विक्रीमध्ये प्रशिक्षित फार्मासिस्टची भूमिका अत्यंत महत्त्वाची असून ऑनलाइन औषध विक्रीमुळे रुग्णांच्या सुरक्षिततेवर परिणाम होत असल्याची भूमिका मांडण्यात आली.

ई-फार्मसी आणि ऑनलाइन कंपन्यांकडून डॉक्टरांच्या प्रिस्क्रिप्शनशिवाय नियमबाह्य पद्धतीने औषध विक्री होत असल्याचा आरोप करत अशा प्रकारांवर कठोर कारवाई करण्याची मागणीही करण्यात आली.

तसेच ड्रग्ज अँड कॉस्मेटिक्स कायद्याची कठोर अंमलबजावणी, औषध व्यवसायातील नियमभंग करणाऱ्यांवर कारवाई तसेच लघु आणि मध्यम केमिस्ट व्यवसायांचे संरक्षण करण्यासाठी शासनाने अन्यायकारक धोरणे मागे घ्यावीत, अशी मागणी संघटनेकडून करण्यात आली.

रुग्णांना सुरक्षित औषध वितरण, योग्य मार्गदर्शन आणि प्रशिक्षित फार्मासिस्टची सेवा उपलब्ध राहावी यासाठी पारंपरिक औषध विक्री व्यवस्था अधिक मजबूत करण्याची आवश्यकता संघटनेने व्यक्त केली.

पिंपरी-चिंचवडमधील सर्व केमिस्ट बांधवांनी एकजुटीने सहभाग नोंदवत संघटनेची ताकद दाखवून दिल्याचे सांगण्यात आले. या बंदला मिळालेल्या प्रतिसादाबद्दल सर्व होलसेलर, रिटेलर आणि औषध विक्रेता बांधवांचे आभार मानण्यात आले.

दरम्यान, पिंपरी-चिंचवड महापालिकेचे महापौर आणि फार्मासिस्ट Ravibhau Landge यांनी देखील ऑनलाइन औषध विक्रीला ठाम विरोध दर्शविला. त्यांनी औषध हे केवळ उत्पादन नसून प्रशिक्षित फार्मासिस्टच्या मार्गदर्शनाखाली दिली जाणारी आरोग्य सेवा असल्याचे मत व्यक्त केले.

काळेवाडी रहाटणी केमिस्ट असोसिएशनचे अध्यक्ष आणि केमिस्ट असोसिएशन ऑफ पुणे डिस्ट्रिक्टचे उपाध्यक्ष विवेक मल्हारी तापकीर यांनीही औषध विक्रेत्यांच्या न्याय्य मागण्यांसाठी संघटनेची भूमिका कायम असल्याचे स्पष्ट केले.