कोल्हापूर जिल्ह्यात ३९२२ रुग्णांना २८.०६ कोटींची मदत; मुख्यमंत्री सहाय्यता निधी ठरतोय ‘आधार’

कोल्हापूर, दि. १७ एप्रिल २०२६ : राज्य शासनाच्या विविध आरोग्य योजनांमधून मदत न मिळालेल्या गरजू रुग्णांसाठी मुख्यमंत्री वैद्यकीय सहाय्यता निधी प्रभावी ‘आधार’ ठरत असून, कोल्हापूर जिल्ह्यात आर्थिक वर्षात ३९२२ रुग्णांना सुमारे २८ कोटी ०६ लाख रुपयांची वैद्यकीय मदत वितरित करण्यात आली आहे.

मुख्यमंत्री देवेंद्र फडणवीस यांच्या दूरदृष्टीतून या योजनेत महत्त्वपूर्ण सुधारणा करण्यात आल्या आहेत. जिल्हा कक्षाची स्थापना, पेपरलेस अर्ज प्रक्रिया आणि अर्जांचा तातडीने निपटारा या उपाययोजनांमुळे मदत वितरण अधिक वेगवान आणि पारदर्शक झाले आहे.

याशिवाय सामंजस्य करार (MoU) आणि क्राउड फंडिंगच्या माध्यमातून विविध रुग्णालये, धर्मादाय संस्था आणि दाते यांचे सहकार्य मिळत आहे. त्यामुळे अधिकाधिक रुग्णांना वेळेत आर्थिक सहाय्य मिळत आहे.

🏥 २० गंभीर आजारांसाठी मदत

या योजनेअंतर्गत कॉक्लियर इम्प्लांट, हृदय, यकृत, किडनी, फुफ्फुस, बोन मॅरो प्रत्यारोपण, कर्करोग उपचार, अपघातग्रस्त रुग्ण, नवजात शिशुंचे आजार, डायालिसिस, बर्न आणि विद्युत अपघात अशा एकूण २० गंभीर आजारांसाठी आर्थिक सहाय्य दिले जाते.

🤝 सामंजस्य करारातून उपचार सुलभ

मुख्यमंत्री सहाय्यता निधी कक्ष, BPCL फाऊंडेशन आणि टाटा मेमोरियल सेंटर यांच्यात बालकांच्या कर्करोग उपचारासाठी सामंजस्य करार करण्यात आला आहे. या करारामुळे CSR अंतर्गत विशेष निधी उपलब्ध होऊन गरजू बालकांना दर्जेदार उपचार सुलभ होणार आहेत.

📊 राज्यस्तरीय मदत

१ एप्रिल २०२५ ते ३१ मार्च २०२६ या कालावधीत राज्यातील ४०,७७६ रुग्णांना ३३३ कोटी रुपयांहून अधिक मदत देण्यात आली आहे. त्यापैकी कोल्हापूर जिल्ह्याचा वाटा लक्षणीय आहे.

गरजू रुग्णांनी या योजनेचा लाभ घेण्यासाठी आणि अधिक माहितीसाठी १८०० १२३ २२११ या टोल फ्री क्रमांकावर संपर्क साधावा, असे आवाहन कक्ष प्रमुख रामेश्वर नाईक यांनी केले आहे.