क्रेडाई नाशिक मेट्रोच्या स्किल अँड एक्सलन्स सेंटरचे भूमिपूजन; कौतुकास्पद उपक्रम – गिरीश महाजन

नाशिक : क्रेडाई नाशिक मेट्रोच्या नवीन कार्यालयाचे आणि स्किल अँड एक्सलन्स सेंटरचे भूमिपूजन राज्याचे मदत व पुनर्वसन मंत्री गिरीश महाजन यांच्या हस्ते संपन्न झाले. प्रशिक्षित आणि कुशल मनुष्यबळ निर्माण करण्यासाठी हा अत्यंत महत्त्वाचा आणि कौतुकास्पद उपक्रम असल्याचे त्यांनी यावेळी सांगितले.

गिरीश महाजन म्हणाले की, उत्तम आणि दर्जेदार निर्मितीसाठी प्रगत तंत्रज्ञान, उच्च प्रतीचा कच्चा माल आणि प्रशिक्षित मनुष्यबळ ही त्रिसूत्री आवश्यक आहे. मनुष्यबळाचे प्रशिक्षण ही सातत्याने सुरू राहणारी प्रक्रिया असून यासाठी क्रेडाई नाशिक मेट्रोने घेतलेला पुढाकार अभिनंदनीय आहे.

मान्यवरांची उपस्थिती

या कार्यक्रमाला महापौर हिमगौरी आडके आहेर, उपमहापौर विलास शिंदे, स्थायी समिती अध्यक्ष मच्छिंद्र सानप, भाजप प्रदेश प्रवक्ते लक्ष्मण सावजी, शिवसेना उपनेते अजय बोरस्ते, गणेश गीते, सुधाकर बडगुजर, निमा अध्यक्ष आशिष नहार, राजेंद्र पानसरे, माजी अध्यक्ष विजय संकलेचा, सुरेश अण्णा पाटील, अनंत राजेगावकर, किरण चव्हाण, सुनील कोतवाल, रवी महाजन यांच्यासह अनेक मान्यवर उपस्थित होते.

संस्थेचे माजी अध्यक्ष विजय आणि निर्मला संकलेचा यांच्या हस्ते पूजन विधी पार पडला.

33,500 चौ.फुटांवर भव्य केंद्र

स्वागतपर भाषणात क्रेडाई नाशिक मेट्रोचे अध्यक्ष गौरव ठक्कर म्हणाले की, शहराच्या विकासात क्रेडाईने नेहमीच मोलाचा सहभाग नोंदवला आहे. अनेकांचे गृहस्वप्न पूर्ण करताना शहराचे अर्थकारण आणि रोजगार निर्मितीतही योगदान दिले आहे.

गंगापूर रोडजवळील चांदशी शिवारात सुमारे 33,500 स्क्वेअर फुट जागेवर हे स्किल अँड एक्सलन्स सेंटर उभारण्यात येणार आहे. याच ठिकाणी आधुनिक आणि सुसज्ज क्रेडाई कार्यालय देखील असणार आहे.

या केंद्रात कार्यशाळा, सेमिनार, प्रशिक्षण वर्ग, मल्टीपर्पज हॉल, आर्ट गॅलरी, कॅफे आणि ॲम्फी थिएटर अशा सुविधा असतील.

ब्रह्मगिरी पर्वतरांगांपासून प्रेरित वास्तुरचना

या केंद्राची वास्तुरचना ब्रह्मगिरी पर्वतरांगांपासून प्रेरित असून पर्वतरांगांचे उतार आणि पठार यांचे प्रतिबिंब दर्शवणारी संकल्पना वापरण्यात आली आहे. अहमदाबादचे सुप्रसिद्ध वास्तुविशारद मथारू आर्किटेक्ट हे सल्लागार असून माजी अध्यक्ष अनंत राजेगावकर आणि कृणाल पाटील यांचे डिझाईन टीममध्ये योगदान आहे.

पर्यावरणपूरक नेट झिरो इमारत

या प्रकल्पात पर्यावरणपूरक उपाययोजना राबवून IGBC प्लॅटिनम रेटिंग मिळवण्याचा प्रयत्न केला जाणार आहे. ही इमारत नेट झिरो बिल्डिंग संकल्पनेवर आधारित असेल.

सिंहस्थ कुंभमेळ्यासाठी लोकसहभाग गरजेचा

गिरीश महाजन म्हणाले की, काही महिन्यांत सुरू होणारा सिंहस्थ कुंभमेळा नाशिकसाठी अत्यंत महत्त्वाचा आहे. यासाठी शहरात मोठ्या प्रमाणात विकासकामे सुरू आहेत. शासन, प्रशासन आणि पोलिसांसोबत नागरिकांचा सहभागही आवश्यक असल्याचे त्यांनी सांगितले.

कामगार कल्याण सप्ताहाचा शुभारंभ

क्रेडाई नाशिक मेट्रोकडून 1 ते 7 मे दरम्यान कामगार कल्याण सप्ताह साजरा केला जाणार आहे. या अंतर्गत बांधकाम कामगारांची नवीन नोंदणी, नूतनीकरण शिबिरे, कौशल्य उन्नती कार्यक्रम, आरोग्य तपासणी आणि सुरक्षा साहित्य वाटप करण्यात येणार आहे.

मानद सचिव तुषार संकलेचा यांनी सांगितले की, या उपक्रमांमुळे अधिकाधिक बांधकाम कामगारांना शासकीय योजनांचा लाभ मिळवून देण्याचा प्रयत्न आहे.

सामंजस्य करार आणि प्रमाणपत्र वितरण

कार्यक्रमादरम्यान क्रेडाई नाशिक मेट्रो, दिशा फाऊंडेशन आणि अॅपेक्स लर्निंग सेंटर यांच्यात सामंजस्य करार करण्यात आला. तसेच कामगार कौशल्य विकास उपक्रमांतर्गत यशस्वी कामगारांना प्रमाणपत्र देऊन गौरविण्यात आले.