महिला आरक्षणावरून आमदार देवयानी फरांदे यांचा विरोधकांवर घणाघात; ‘नारी शक्तीचा अपमान’ असा आरोप

नाशिक/प्रतिनिधी – महिला आरक्षण विधेयकाच्या मुद्द्यावरून राजकीय वातावरण तापले असून भाजपच्या आमदार प्रा. देवयानी फरांदे यांनी विरोधकांवर जोरदार टीका केली आहे. संसदेत महिला आरक्षणाला विरोध करणाऱ्या विरोधकांनी देशातील ‘नारी शक्तीचा’ अपमान केला असल्याचा आरोप त्यांनी केला.

एन.डी. पटेल रोड येथील वसंत स्मृती कार्यालयात आयोजित पत्रकार परिषदेत बोलताना त्यांनी काँग्रेसवर निशाणा साधला. त्यांच्या मते, काँग्रेसच्या कार्यकाळात महिलांना मूलभूत सुविधांपासून वंचित राहावे लागले आणि आजही महिला सक्षमीकरणाच्या निर्णयांना विरोध करण्याची प्रवृत्ती कायम आहे.

फरांदे यांनी सांगितले की, केंद्र सरकारने ३३ टक्के महिला आरक्षणासाठी घटनात्मक प्रक्रिया पूर्ण करत ऐतिहासिक पाऊल उचलले आहे. मात्र विरोधक एका बाजूला विधेयकाला पाठिंबा देतात आणि दुसऱ्या बाजूला मतदारसंघ पुनर्रचनेवर प्रश्न उपस्थित करतात, हा त्यांचा दुटप्पीपणा असल्याची टीका त्यांनी केली.

मतदारसंघ पुनर्रचना आणि जनगणनेच्या संदर्भात बोलताना त्यांनी स्पष्ट केले की, लोकसभा व विधानसभा जागांचे पुनर्वाटप संविधानातील तरतुदीनुसार होते. अनुच्छेद ८१ आणि ८२ नुसार लोकसंख्येच्या आधारे मतदारसंघांची रचना केली जाते आणि सीमांकन आयोगामार्फत त्याचे पुनर्वितरण केले जाते. त्यामुळे महिला आरक्षणाची अंमलबजावणी जनगणना व पुनर्रचना पूर्ण झाल्यानंतरच शक्य असल्याचे त्यांनी सांगितले.

यावेळी त्यांनी ‘नारी शक्ती वंदन अधिनियम’ हा महिलांच्या राजकीय सक्षमीकरणाचा महत्त्वाचा टप्पा असल्याचे नमूद केले. या निर्णयामुळे लोकसभा व विधानसभांमध्ये महिलांना ३३ टक्के प्रतिनिधित्व मिळणार असून सामाजिक न्याय आणि समानतेसाठी हा मोठा निर्णय असल्याचे त्यांनी स्पष्ट केले.

यावेळी भाजपचे जिल्हाध्यक्ष सुनील केदार, चिटणीस रोहिणी नायडू, प्रदेश प्रवक्ते गोविंद बोरसे तसेच नगरसेविका आणि कार्यकर्ते मोठ्या संख्येने उपस्थित होते.