१८ ऑगस्टला पिंपरी-चिंचवडमध्ये आरक्षण उपवर्गीकरणासाठी ‘जनआक्रोश महामोर्चा’; ५८ जातींचा सहभाग

प्रतिनिधी : रोहन सोनाळे 

पिंपरी, दि. 15 : अनुसूचित जातीतील आरक्षणाचा लाभ समाजातील शेवटच्या घटकापर्यंत पोहोचावा आणि आरक्षणाचा न्याय्य वाटा सर्व घटकांना मिळावा, या मागणीसाठी आरक्षण उपवर्गीकरणाच्या समर्थनार्थ मंगळवार, १८ ऑगस्ट रोजी पिंपरी-चिंचवडमध्ये ‘जनआक्रोश महामोर्चा’ काढण्यात येणार आहे. आरक्षण उपवर्गीकरण समर्थन समितीच्या वतीने आयोजित करण्यात आलेल्या या महामोर्चात अनुसूचित जातीतील ५८ जातींचे प्रतिनिधी सहभागी होणार असून मातंग समाजातील विविध नेते, पदाधिकारी आणि कार्यकर्तेही मोठ्या संख्येने सहभागी होणार असल्याची माहिती समितीच्या वतीने देण्यात आली.

आरक्षणाचा लाभ समाजातील सर्व घटकांपर्यंत समान पद्धतीने पोहोचणे आवश्यक आहे. काही घटकांना आरक्षणाचा अपेक्षित लाभ मिळत नसल्याने त्यांच्यापर्यंत हा लाभ प्रभावीपणे पोहोचविण्यासाठी आरक्षणाचे उपवर्गीकरण आवश्यक असल्याची भूमिका समितीने मांडली आहे.

डॉ. बाबासाहेब आंबेडकर यांनी दिलेल्या समता आणि सामाजिक न्यायाच्या विचारांनुसार समाजातील प्रत्येक घटकाला विकासाची समान संधी मिळणे गरजेचे आहे. त्यासाठी आरक्षणाच्या लाभाचे अधिक न्याय्य वितरण होणे आवश्यक असल्याचे समितीच्या पदाधिकाऱ्यांनी स्पष्ट केले.

‘आरक्षण काढून घेणे हा उद्देश नाही’

आरक्षण उपवर्गीकरणाला काही संघटनांकडून विरोध होत असला तरी उपवर्गीकरणाचा उद्देश आरक्षण काढून घेणे नसल्याचे समितीने स्पष्ट केले. आरक्षणाचा लाभ अधिक गरजू आणि वंचित घटकांपर्यंत प्रभावीपणे पोहोचविणे, हा उपवर्गीकरणाचा प्रमुख हेतू असल्याचे समितीच्या पदाधिकाऱ्यांनी सांगितले.

वाल्मिकी, वडार आणि मादिगा समाजाचा पाठिंबा

आरक्षण उपवर्गीकरणाच्या समर्थनार्थ आयोजित करण्यात येणाऱ्या या महामोर्चाला वाल्मिकी समाज, वडार समाज आणि मादिगा समाजानेही पाठिंबा दर्शविला आहे. या समाजांचे नेते व प्रतिनिधी पत्रकार परिषदेला उपस्थित होते.

सामाजिक नेते मारुती पंद्री, ॲड. सुशील मंचरकर आणि भारत विटकर यांचीही यावेळी उपस्थिती होती. विविध समाजघटकांचा पाठिंबा मिळत असल्याने महामोर्चाला व्यापक स्वरूप प्राप्त होत असल्याचे समितीच्या वतीने सांगण्यात आले.

सरकारने तातडीने निर्णय घेण्याची मागणी

महाराष्ट्र सरकारने आरक्षण उपवर्गीकरणाबाबत तातडीने निर्णय घेऊन त्याची अंमलबजावणी करावी, अशी प्रमुख मागणी या महामोर्चाच्या माध्यमातून करण्यात येणार आहे. अनुसूचित जातीतील ५८ जातींच्या प्रतिनिधींचा आंदोलनाला पाठिंबा असल्याचे समितीने सांगितले.

तसेच महाराष्ट्रातील मातंग समाजातील नेते, पदाधिकारी आणि कार्यकर्ते मोठ्या संख्येने महामोर्चात सहभागी होणार असल्याचे आयोजकांनी स्पष्ट केले.

चिंचवड स्टेशन ते निगडी तहसील कार्यालयापर्यंत मोर्चा

मंगळवार, १८ ऑगस्ट रोजी सकाळी १० वाजता चिंचवड स्टेशन येथील आद्यक्रांती गुरु लहुजी वस्ताद साळवे स्मारकापासून महामोर्चाला सुरुवात होणार आहे. तेथून मोर्चा निगडीच्या दिशेने रवाना होऊन निगडी तहसील कार्यालयासमोर त्याची सांगता होणार आहे.

आरक्षण उपवर्गीकरणाचा निर्णय तातडीने घेऊन त्याचा लाभ अनुसूचित जातीतील शेवटच्या घटकापर्यंत पोहोचवावा, अशी मागणी यावेळी शासनाकडे करण्यात येणार आहे. महामोर्चात अनुसूचित जातीतील नागरिकांनी मोठ्या संख्येने सहभागी व्हावे, असे आवाहन आरक्षण उपवर्गीकरण समर्थन समितीच्या वतीने करण्यात आले आहे.

पत्रकार परिषदेला विविध समाजघटकांचे पदाधिकारी उपस्थित

महामोर्चाच्या पार्श्वभूमीवर आयोजित पत्रकार परिषदेला आमदार अमित गोरखे, बापू घोलप, भाऊसाहेब आडागळे, संदिपान झोंबाडे, अनिल सौंदडे, ॲड. सुशील मंचरकर (वाल्मिकी समाज), नेताजी शिंदे, गणेश लोंढे, गणेश अवघडे, भारत विटकर (वडार समाज), मारुती पंदरी (मादिगा समाज), मनोज तोरडमल, मयूर जाधव, संदीप जाधव, चंद्रकांत लोंढे, मारुती जाधव, अविनाश शिंदे, बाबासाहेब रसाळ, बाबासाहेब पाटोळे, अरुण जोगदंड, संजय ससाने, नितीन घोलप, सुनील भिसे, सुरज कांबळे, आशाताई बापू वाघमारे, कृष्णा साबळे, शहाणे भानुदास नेटके, भगवान शिंदे, युवराज दाखले, सुरेश जोगदंड, शिवाजी साळवे, सतीश भवाळ, अविनाश लोणारी, संजय एडके, राजू आवळे, विठ्ठल झिंजुर्डे, नाना कांबळे, भाऊ कसबे, मारुती सोनटक्के, सागर कापसे, प्रसाद केसरे, स्वप्नील वाघमारे, मयूर घोलप, शंकर खवळे, ऋषी वाघमारे, शिवाजी खडसे, सुरज कांबळे, महादेव आडागळे आणि योगेश लोंढे यांच्यासह विविध समाजघटकांचे पदाधिकारी आणि समाजबांधव उपस्थित होते.

महामोर्चाच्या माध्यमातून आरक्षण उपवर्गीकरणाच्या मागणीला व्यापक जनसमर्थन असल्याचे दाखवून देण्याचा आयोजकांचा प्रयत्न असून, सरकारने सामाजिक न्यायाच्या दृष्टीने तातडीने निर्णय घ्यावा, अशी मागणी समितीने केली आहे.

संपर्क : श्री. जाधव – 9503093322