‘विश्वगुरू भारत’ राज्यस्तरीय भव्य रांगोळी स्पर्धेचे निकाल जाहीर; महाराष्ट्रातून १०० हून अधिक स्पर्धकांचा सहभाग

नाशिक ब्यूरो:

नाशिक : भारतीय जनता पार्टी महाराष्ट्र प्रदेश गुरुपौर्णिमा समितीतर्फे आयोजित करण्यात आलेल्या ‘विश्वगुरू भारत’ राज्यस्तरीय भव्य रांगोळी स्पर्धेला महाराष्ट्रभरातून उत्स्फूर्त प्रतिसाद मिळाला. या स्पर्धेत महाराष्ट्रातील विविध शहरांमधून १०० हून अधिक स्पर्धकांनी सहभाग घेतला.

नागपूर, शिरपूर, जुन्नर, यवतमाळ यांसह राज्यातील विविध भागांतील रांगोळी कलाकारांनी या स्पर्धेत सहभाग घेत आपली कलात्मकता सादर केली. या निमित्ताने आयोजित करण्यात आलेल्या रांगोळी प्रदर्शनालाही नाशिककरांकडून मोठा प्रतिसाद मिळत आहे.

मान्यवरांकडून प्रदर्शनाचे कौतुक

या रांगोळी प्रदर्शनाला राज्याचे कुंभमेळा मंत्री गिरीश महाजन, विभागीय महसूल आयुक्त प्रवीण गेडाम, संत सेवा संघाचे संजय गोडबोले गुरुजी यांच्यासह विविध मान्यवरांनी भेट दिली.

प्रदर्शनातील कलाकृतींचे तसेच उत्कृष्ट आयोजनाचे मान्यवरांनी विशेष कौतुक केले. कलाकारांना आपली कला सादर करण्यासाठी अशा प्रकारची रांगोळी प्रदर्शने वारंवार आयोजित करण्यात यावीत, असा अभिप्रायही त्यांनी व्यक्त केला.

रांगोळी स्पर्धेतील विजेते

स्पर्धेचे निकाल जाहीर करण्यात आले असून पहिल्या गटात म्हणजेच इयत्ता पाचवी ते दहावी या गटात पुढील स्पर्धकांनी यश संपादन केले.

प्रथम क्रमांक : मौर्य गायकवाड

द्वितीय क्रमांक : मोक्षदा देशपांडे

तृतीय क्रमांक : समृद्धी सोनार

उत्तेजनार्थ : मुस्कान अन्सारी

उत्तेजनार्थ : लावण्या वाघ

तर मोठ्या गटात पुढील स्पर्धक विजेते ठरले.

प्रथम क्रमांक : सुरेश पवार

द्वितीय क्रमांक : पूजा बेलोकर

तृतीय क्रमांक : शितल महाजन

उत्तेजनार्थ : दिशा पाटील

उत्तेजनार्थ : स्वरा बोराडे

प्राचार्य प्रफुल्ल चव्हाण आणि मानसी सागर यांची परीक्षक म्हणून भूमिका

या राज्यस्तरीय रांगोळी स्पर्धेसाठी प्राचार्य प्रफुल्ल चव्हाण आणि सौ. मानसी सागर यांनी परीक्षक म्हणून काम पाहिले. विविध स्पर्धकांनी सादर केलेल्या रांगोळ्यांचे परीक्षण करून त्यांनी विजेत्यांची निवड केली.

निलेश देशपांडे यांचे विशेष योगदान

नाशिकचे प्रसिद्ध रांगोळीकार निलेश देशपांडे आणि त्यांच्या सहकाऱ्यांनी ही रांगोळी स्पर्धा व प्रदर्शन यशस्वी करण्यासाठी विशेष परिश्रम घेतले. राज्यभरातून आलेल्या कलाकारांना आपली कला सादर करण्यासाठी योग्य व्यासपीठ उपलब्ध करून देण्यात त्यांच्या टीमचे महत्त्वपूर्ण योगदान राहिले.

६ सप्टेंबरला पारितोषिक वितरण सोहळा

या स्पर्धेचा पारितोषिक वितरण सोहळा रविवार, ६ सप्टेंबर २०२६ रोजी दुपारी ४ वाजता ठक्कर डोम, नाशिक येथे आयोजित करण्यात आला आहे. स्पर्धेतील विजेत्यांना या वेळी पारितोषिक प्रदान करण्यात येणार आहे.

तसेच स्पर्धेत सहभागी झालेल्या सर्व स्पर्धकांना सन्मानपत्र देण्यात येणार असल्याचे आयोजन समितीच्या वतीने सांगण्यात आले आहे.

नाशिककरांसाठी रांगोळी प्रदर्शन विनामूल्य खुले

‘विश्वगुरू भारत’ रांगोळी प्रदर्शनाला नाशिककरांकडून उत्स्फूर्त प्रतिसाद मिळत असून हे प्रदर्शन विनामूल्य नागरिकांसाठी खुले आहे. उद्या सकाळी १० वाजेपासून सायंकाळपर्यंत नागरिकांना प्रदर्शन पाहता येणार असल्याची माहिती आयोजन समितीने दिली आहे.

कलाकारांच्या कलागुणांना प्रोत्साहन देण्याबरोबरच भारतीय कला आणि संस्कृतीचा वारसा जपण्याच्या उद्देशाने आयोजित करण्यात आलेल्या या प्रदर्शनामुळे नाशिकच्या कला क्षेत्रात उत्साहाचे वातावरण निर्माण झाले आहे.

आयोजन समितीचे संयोजक व प्रदेश प्रवक्ते लक्ष्मण सावजी यांनी नागरिकांनी मोठ्या संख्येने उपस्थित राहून या रांगोळी प्रदर्शनाचा आनंद घ्यावा, असे आवाहन केले आहे.