मुंबईला दिलासा! मोडक सागर तलाव ओसंडून वाहू लागला; पाणीपुरवठा करणाऱ्या ७ पैकी ४ तलाव भरले

मुंबई | प्रतिनिधी देवानंद शिंदे 

मुंबईकरांसाठी दिलासादायक बातमी म्हणजे, मुंबईला पाणीपुरवठा करणारा मोडक सागर तलाव गुरुवार, २३ जुलै २०२६ रोजी पहाटे २ वाजून ७ मिनिटांनी ओसंडून वाहू लागला आहे. तलाव भरल्यानंतर त्याचा एक दरवाजा उघडण्यात आल्याची माहिती बृहन्मुंबई महानगरपालिकेच्या जल अभियंता विभागाने दिली आहे.

यंदाच्या पावसाळ्यात मुंबईला पाणीपुरवठा करणाऱ्या सात तलावांपैकी चार तलाव पूर्ण भरून ओसंडून वाहू लागले असून, त्यामुळे आगामी काळातील पाणीपुरवठ्याबाबत मोठा दिलासा मिळाला आहे.

सर्व सात तलावांमध्ये ६९.७४ टक्के जलसाठा

महानगरपालिकेने दिलेल्या माहितीनुसार, मुंबईला पाणीपुरवठा करणाऱ्या सात तलावांची एकूण जलसाठा क्षमता १४ लाख ४७ हजार ३६३ दशलक्ष लीटर इतकी आहे. गुरुवारी सकाळी ६ वाजेपर्यंतच्या नोंदीनुसार, सर्व तलावांमध्ये मिळून १० लाख ९ हजार ४३२ दशलक्ष लीटर (६९.७४ टक्के) इतका जलसाठा उपलब्ध आहे.

मोडक सागरची क्षमता १२८,९२५ दशलक्ष लीटर

ठाणे जिल्ह्यातील शहापूर तालुक्यात वैतरणा नदीवर उभारलेला मोडक सागर प्रकल्प मुंबईच्या प्रमुख पिण्याच्या पाण्याच्या स्रोतांपैकी एक आहे. या तलावाची कमाल जलधारण क्षमता १२८,९२५ दशलक्ष लीटर असून, मुंबईच्या एकूण पाणीपुरवठ्यात त्याचा ११.२२ टक्के वाटा आहे.

मोडक सागर प्रकल्पाचे बांधकाम सन १९५४ मध्ये पूर्ण झाले असून, त्याचे व्यवस्थापन बृहन्मुंबई महानगरपालिकेकडे आहे. मुंबईपासून सुमारे १२० किलोमीटर अंतरावर असलेल्या या धरणाची लांबी ५४८.६४ मीटर तर उंची ८२.२९६ मीटर आहे.

यंदा चार तलाव ओसंडून वाहू लागले

यंदाच्या पावसाळ्यात आतापर्यंत खालील तलाव पूर्ण भरले आहेत.

विहार तलाव – ७ जुलै २०२६

तुळशी तलाव – ७ जुलै २०२६

तानसा तलाव – २२ जुलै २०२६

मोडक सागर तलाव – २३ जुलै २०२६

यामुळे मुंबईच्या पाणीपुरवठ्याची स्थिती अधिक मजबूत झाली असून, उर्वरित तीन तलावांतील जलसाठाही सातत्याने वाढत आहे.

गेल्या तीन वर्षांतील मोडक सागर ओसंडण्याच्या तारखा

२०२५: ९ जुलै

२०२४: २५ जुलै

२०२३: २७ जुलै

२०२६: २३ जुलै

सतत सुरू असलेल्या दमदार पावसामुळे तलावांच्या पाणलोट क्षेत्रात मोठ्या प्रमाणावर पाण्याची आवक सुरू असून, येत्या काही दिवसांत उर्वरित जलाशयांतील जलसाठाही आणखी वाढण्याची शक्यता आहे.