राहटणी-काळेवाडीतील नैसर्गिक नाल्यावर अतिक्रमणाचा आरोप; कारवाई न झाल्यास आंदोलनाचा इशारा

पुणे प्रतिनिधी रोहन सोनाळे 

पिंपरी-चिंचवड, दि. २५ मे : प्रभाग क्रमांक २७ अंतर्गत राहटणी-काळेवाडी परिसरातील साई सागर कॉलनी, वृंदावन कॉलनी आणि तापकीर नगर भागातील नैसर्गिक नाल्यावर कथित अतिक्रमण झाल्याचा गंभीर आरोप लोकसेवक युवराज दाखले यांनी केला आहे. पावसाळा जवळ येत असताना तातडीने कारवाई न झाल्यास संपूर्ण परिसर पूरस्थितीच्या धोक्यात येऊ शकतो, असा इशाराही त्यांनी दिला आहे.

युवराज दाखले यांनी प्रसिद्धीस दिलेल्या निवेदनात म्हटले आहे की, परिसरातील सुमारे २० फूट रुंदीचा नैसर्गिक नाला कथितपणे मुरूम आणि दगड टाकून अरुंद करण्यात आला आहे. तसेच काही ठिकाणी बांधकामे आणि संरक्षक भिंतींमुळे नाल्याचा नैसर्गिक प्रवाह बाधित झाल्याचा आरोपही त्यांनी केला आहे.

त्यांच्या म्हणण्यानुसार, सध्या नाल्याची रुंदी कमी झाल्यामुळे मुसळधार पावसात परिसरात पाणी साचण्याचा धोका वाढला आहे. मागील वर्षीही पावसादरम्यान नागरिकांच्या घरांमध्ये पाणी शिरल्याने मोठे नुकसान झाल्याचा दावा त्यांनी केला आहे.

युवराज दाखले यांनी संबंधित प्रकरणात महानगरपालिका प्रशासनावरही प्रश्नचिन्ह उपस्थित केले असून नैसर्गिक नाल्यांवरील अतिक्रमण हटवण्यासाठी तातडीने उपाययोजना करण्याची मागणी केली आहे.

प्रमुख मागण्या पुढीलप्रमाणे :

• नैसर्गिक नाल्याची तातडीने मोजणी करून कथित अतिक्रमण हटवावे.

• संबंधित जबाबदार घटक आणि दोषी अधिकाऱ्यांवर योग्य ती कायदेशीर कारवाई करावी.

• नाला मूळ स्थितीत पुनर्स्थापित करून संरक्षक उपाययोजना कराव्यात.

• पावसाळ्यापूर्वी आवश्यक उपाय न झाल्यास आंदोलन छेडण्याचा इशारा देण्यात आला आहे.

याबाबत महानगरपालिका आयुक्त, जिल्हाधिकारी आणि पोलीस आयुक्त यांना निवेदन देण्यात आल्याची माहिती युवराज दाखले यांनी दिली.

दरम्यान, या प्रकरणात संबंधित बांधकाम व्यावसायिक, शाळा व्यवस्थापन आणि प्रशासनाची अधिकृत प्रतिक्रिया अद्याप समोर आलेली नाही. संबंधित विभागांकडून तपास आणि वस्तुस्थिती स्पष्ट झाल्यानंतर पुढील चित्र स्पष्ट होणार आहे.