कोल्हापूर जिल्ह्यात ३९२२ रुग्णांना २८.०६ कोटींची मदत; मुख्यमंत्री देवेंद्र फडणवीस यांच्या पुढाकाराने आरोग्यसेवेला गती

कोल्हापूर जिल्ह्यात ३९२२ रुग्णांना २८.०६ कोटींची मदत

कोल्हापूर, दि. १७ : मुख्यमंत्री वैद्यकीय सहाय्यता निधीच्या माध्यमातून कोल्हापूर जिल्ह्यातील ३९२२ गरजू रुग्णांना सुमारे २८ कोटी ०६ लाख रुपयांची आर्थिक मदत वितरित करण्यात आली आहे. शासनाच्या विविध आरोग्य योजनांमधून लाभ न मिळालेल्या रुग्णांसाठी हा निधी मोठा आधार ठरत आहे.

मुख्यमंत्री Devendra Fadnavis यांच्या पुढाकारातून या योजनेत अनेक सकारात्मक बदल करण्यात आले आहेत. जिल्हा कक्षांची स्थापना, पेपरलेस अर्ज प्रक्रिया आणि अर्जांचा जलद निपटारा यामुळे मदत वितरण अधिक सुलभ व पारदर्शक झाले आहे. तसेच सामंजस्य करार व CSR माध्यमातून विविध संस्था, रुग्णालये आणि दाते यांचे सहकार्यही मिळत आहे.

या योजनेतून कॉक्लियर इम्प्लांट, हृदय, किडनी, कर्करोग उपचार, अपघातग्रस्त, बालकांच्या शस्त्रक्रिया अशा एकूण २० गंभीर आजारांसाठी आर्थिक सहाय्य दिले जाते. त्यामुळे अनेक गरजू रुग्णांना वेळेत उपचार मिळून त्यांचे जीवनमान सुधारण्यास मदत होत आहे.

राज्यस्तरावर १ एप्रिल २०२५ ते ३१ मार्च २०२६ या कालावधीत ४० हजार ७७६ रुग्णांना तब्बल ३३३ कोटी रुपयांहून अधिक मदत देण्यात आली आहे. यामध्ये कोल्हापूर जिल्ह्याचा मोठा वाटा असून, स्थानिक पातळीवरही या योजनेचा लाभ मोठ्या प्रमाणात होत आहे.

दरम्यान, गरजू रुग्णांनी या योजनेचा लाभ घेण्यासाठी १८०० १२३ २२११ या टोल फ्री क्रमांकावर संपर्क साधण्याचे आवाहन प्रशासनाकडून करण्यात आले आहे.