वसई–विरारमधील वीज समस्यांवर तातडीने उपाययोजना करा; राज्यमंत्री मेघना साकोरे-बोर्डीकर यांचे निर्देश

मेघना साकोरे-बोर्डीकर यांनी वसई–विरार महानगरपालिका क्षेत्रातील वीज समस्यांवर तातडीने उपाययोजना करण्याचे निर्देश दिले आहेत. लोकप्रतिनिधींनी मांडलेल्या विविध मुद्द्यांवर सकारात्मक निर्णय घेऊन त्वरीत कार्यवाही करावी, असे त्यांनी स्पष्ट केले.

एमएसईबी होल्डिंग कंपनीच्या सभागृहात आयोजित आढावा बैठकीत त्या बोलत होत्या. बैठकीस आमदार राजन नाईक, आमदार स्नेहा दुबे, आमदार विलास तरे (दूरदृश्य प्रणालीद्वारे), महापारेषणचे संचालक सतीश चव्हाण, महावितरणचे संयुक्त व्यवस्थापकीय संचालक दिलीप जगदाळे तसेच संबंधित अधिकारी उपस्थित होते.

राज्यमंत्री साकोरे-बोर्डीकर यांनी सांगितले की, वसई–विरार परिसरातील तात्काळ पूर्ण होऊ शकणारी कामे प्राधान्याने मार्गी लावावीत. तसेच मोठ्या वीज प्रकल्पांची टप्प्याटप्प्याने अंमलबजावणी करणे आवश्यक आहे.

वीज कामांमधील त्रुटींवर कठोर भूमिका घेत संबंधितांवर जबाबदारी निश्चित करून आवश्यक ती कारवाई करण्याचे निर्देश त्यांनी दिले. तसेच फ्लाइंग स्क्वॉडचा प्रभावी वापर करून सविस्तर अहवाल सादर करण्यास सांगितले.

यावेळी आमदार राजन नाईक आणि स्नेहा दुबे यांनीही वसई–विरार भागातील वीज समस्यांबाबत सविस्तर माहिती मांडली.

या निर्णयामुळे वसई–विरार परिसरातील वीजपुरवठा अधिक सुरळीत होण्यास मदत होईल, अशी अपेक्षा व्यक्त करण्यात येत आहे.