महाराष्ट्र आरोग्य विज्ञान विद्यापीठाचा २८ वा वर्धापन दिन उत्साहात; गुणवंत विद्यार्थी, शिक्षक व आरोग्य क्षेत्रातील मान्यवरांचा गौरव

नाशिक (ब्युरो) : महाराष्ट्र आरोग्य विज्ञान विद्यापीठाचा २८ वा वर्धापन दिन सोहळा उत्साहपूर्ण वातावरणात संपन्न झाला. या कार्यक्रमात पद्मश्री चैत्राम पवार, पद्मश्री पोपटराव पवार, विद्यापीठाचे कुलगुरू (अतिरिक्त कार्यभार) प्रा. संजीव सोनवणे यांच्यासह विविध क्षेत्रातील मान्यवर उपस्थित होते. यावेळी आरोग्य शिक्षण, संशोधन, सामाजिक बांधिलकी आणि शाश्वत विकास यावर भर देण्यात आला.

कार्यक्रमात प्रमुख अतिथी म्हणून बोलताना पद्मश्री चैत्राम पवार यांनी समाजाच्या शाश्वत विकासासाठी प्रत्येक नागरिक आरोग्यसंपन्न असणे आवश्यक असल्याचे सांगितले. आरोग्य शिक्षणाचे उद्दिष्ट केवळ पदवीधारक तयार करणे नसून समाजाप्रती संवेदनशील, जबाबदार आणि उत्कृष्ट आरोग्यसेवा देणारे व्यावसायिक घडविणे हे असल्याचे त्यांनी नमूद केले.

पद्मश्री पोपटराव पवार यांनी आरोग्य, पाणी, शेती आणि पर्यावरण यांचे परस्परसंबंध स्पष्ट करत प्रतिबंधात्मक आरोग्यसेवा, पोषण, स्वच्छता आणि जनजागृती यावर अधिक भर देण्याची आवश्यकता व्यक्त केली. समाजातील आरोग्यविषयक समस्यांवर उपाय शोधण्यासाठी संशोधन समाजाभिमुख असणे गरजेचे असल्याचे त्यांनी सांगितले.

अध्यक्षीय भाषणात कुलगुरू प्रा. संजीव सोनवणे यांनी गुणवत्तापूर्ण आरोग्य शिक्षण, संशोधन आणि तंत्रज्ञानाधिष्ठित परीक्षा प्रणालीमुळे विद्यापीठ राष्ट्रीय स्तरावर वेगाने प्रगती करत असल्याचे सांगितले. राष्ट्रीय शिक्षण धोरण, कौशल्य विकास आणि नवोपक्रमांच्या माध्यमातून विद्यापीठ विद्यार्थ्यांना जागतिक दर्जाचे शिक्षण देण्याचा प्रयत्न करत असल्याचे त्यांनी नमूद केले.

यावेळी आरोग्य क्षेत्रातील उल्लेखनीय योगदानाबद्दल डॉ. अविनाश सुपे यांना सन २०२५-२६ चा ‘जीवन गौरव पुरस्कार’ प्रदान करण्यात आला. मानचिन्ह, शाल आणि सन्मानपत्र देऊन त्यांचा गौरव करण्यात आला.

वर्धापन दिनानिमित्त विद्यापीठाशी संलग्न वैद्यकीय, दंत, आयुर्वेद, युनानी, होमिओपॅथी, परिचर्या आणि अन्य विद्याशाखांतील प्रथम क्रमांक पटकावणाऱ्या ३४ विद्यार्थ्यांना सुवर्णपदके आणि प्रमाणपत्रे प्रदान करण्यात आली. याशिवाय उत्कृष्ट शिक्षक, उत्कृष्ट विद्यार्थी, उत्कृष्ट खेळाडू विद्यार्थी, राष्ट्रीय सेवा योजना स्वयंसेवक, सांस्कृतिक क्षेत्रातील गुणवंत आणि विशेष कामगिरी करणाऱ्यांचाही गौरव करण्यात आला.

राष्ट्रीय सेवा योजना पुरस्कार, उत्कृष्ट शिक्षक पुरस्कार, उत्कृष्ट विद्यार्थी पुरस्कार, उत्कृष्ट खेळाडू विद्यार्थी पुरस्कार तसेच राज्यस्तरीय आणि राष्ट्रीय स्तरावरील विविध स्पर्धांमध्ये विद्यापीठाचे प्रतिनिधित्व करणाऱ्या विद्यार्थ्यांना सन्मानचिन्ह व प्रमाणपत्र देऊन गौरविण्यात आले.

कार्यक्रमाच्या प्रारंभी कुलगुरू प्रा. संजीव सोनवणे यांच्या हस्ते विद्यापीठ परिसरात ध्वजारोहण करण्यात आले. कार्यक्रमाचे प्रास्ताविक कुलसचिव डॉ. राजेंद्र बंगाळ यांनी केले, तर सूत्रसंचालन जनसंपर्क अधिकारी डॉ. स्वप्नील तोरणे यांनी केले.

या सोहळ्यास विद्यापीठ प्राधिकरण सदस्य, विविध क्षेत्रातील मान्यवर, शिक्षक, विद्यार्थी, पालक तसेच विद्यापीठाचे अधिकारी व कर्मचारी मोठ्या संख्येने उपस्थित होते. वर्धापन दिनानिमित्त आयोजित कार्यक्रमातून गुणवत्तापूर्ण आरोग्य शिक्षण, संशोधन आणि समाजसेवेचा संदेश देण्यात आला.