महाराजस्व अभियान’ कल्याणमध्ये उत्साहात; आमदार राजेश मोरे यांची आरोग्य तपासणी

प्रतिनिधी | दिपक शिंदे :

ठाणे:

राज्य शासनाच्या ‘श्री छत्रपती शिवाजी महाराज महाराजस्व अभियान’ (समाधान शिबिर टप्पा १) अंतर्गत कल्याण तालुक्यातील ठाकुर्ली मंडळात भव्य शिबिराचे आयोजन करण्यात आले. या शिबिरात शेकडो नागरिकांना विविध शासकीय योजनांचा प्रत्यक्ष लाभ मिळाला.

डोंबिवली (पूर्व) येथे पार पडलेल्या या कार्यक्रमाला कल्याण ग्रामीण विधानसभा मतदारसंघाचे आमदार राजेश मोरे यांनी विशेष उपस्थिती लावली. ठाणे जिल्हाधिकारी डॉ. श्रीकृष्ण पांचाळ यांच्या मार्गदर्शनाखाली तसेच उपजिल्हाधिकारी अंजली पवार यांच्या देखरेखीखाली शिबिराचे कामकाज पार पडले.

या शिबिरात महसूल व भूमी अभिलेख विभाग, कल्याण-डोंबिवली महानगरपालिका (KDMC), पंचायत समिती, कृषी विभाग, कामगार विभाग, पुरवठा विभाग तसेच संजय गांधी निराधार योजनेचे स्टॉल्स उभारण्यात आले होते. नागरिकांना विविध दाखले आणि सेवा सहज उपलब्ध करून देण्यात आल्या.

शिबिराचे विशेष आकर्षण म्हणजे आमदार राजेश मोरे यांनी दाखवलेला प्रत्यक्ष सहभाग. त्यांनी स्वतः रांगेत उभे राहून ‘आभा कार्ड’ (ABHA Card) तयार करून घेतले. तसेच आरोग्य शिबिरात सहभागी होत स्वतःची आरोग्य तपासणीही करून घेतली. “प्रशासन जनतेच्या दारी आल्यास योजनांचा लाभ घेणे अधिक सोपे होते,” असे त्यांनी यावेळी सांगितले.

या उपक्रमामुळे ठाकुर्ली, डोंबिवली आणि कल्याण परिसरातील अनेक गरजूंना विविध योजनांचा लाभ मिळाला. दाखले मिळण्यातील अडचणी दूर झाल्याने नागरिकांनी समाधान व्यक्त केले.

पुढील शिबिर १७ एप्रिल रोजी गोवली येथे

या अभियानाचा पुढील टप्पा १७ एप्रिल रोजी गोवली (म्हारळ मंडळ) येथे होणार असून नागरिकांनी मोठ्या संख्येने सहभागी होऊन प्रलंबित कामे पूर्ण करून घ्यावीत, असे आवाहन प्रशासनाकडून करण्यात आले आहे.