कुळगाव-बदलापूरमध्ये वीज उपकेंद्रासाठी चार एकर जमीन हस्तांतरित; मंत्रिमंडळाची मंजुरी

कुळगाव-बदलापूर – अंबरनाथ आणि कुळगाव-बदलापूर परिसरातील वाढत्या शहरीकरणामुळे वाढलेल्या वीज मागणीची पूर्तता करण्यासाठी महत्त्वाचा निर्णय राज्य मंत्रिमंडळाच्या बैठकीत घेण्यात आला. मौजे कात्रप येथील विकास आराखड्यातील स्टेडियमसाठी आरक्षित असलेल्या भूखंडापैकी चार एकर जमीन वीज उपकेंद्र उभारणीसाठी टाटा पॉवर कंपनीस हस्तांतरित करण्यास मंजुरी देण्यात आली.

मुख्यमंत्री देवेंद्र फडणवीस यांच्या अध्यक्षतेखाली झालेल्या मंत्रिमंडळ बैठकीत हा निर्णय घेण्यात आला. परिसरातील वाढती लोकसंख्या आणि वाढती वीज गरज लक्षात घेता नवीन उपकेंद्र उभारण्याची मागणी करण्यात आली होती.

महाराष्ट्र राज्य वीज वितरण कंपनीने या प्रकल्पासाठी टाटा पॉवर कंपनीची शिफारस केली असून, या ठिकाणी ११०/२२ के.व्ही. क्षमतेचे आधुनिक वीज उपकेंद्र उभारले जाणार आहे. या उपकेंद्रामुळे परिसरातील वीज पुरवठा अधिक सक्षम, स्थिर आणि सुरळीत होण्यास मदत होणार आहे.

या निर्णयामुळे अंबरनाथ आणि बदलापूर परिसरातील नागरिकांना भविष्यातील वाढत्या वीज गरजांसाठी मोठा दिलासा मिळणार असल्याचे प्रशासनाकडून सांगण्यात आले आहे.